Áleýmettik jelide zańdy elemeitinin ashyq kórsetip, ózine eshqandai shara qoldanylmaitynyn málimdegen júrgizýshiniń áreketi jaýapsyz qalmady, dep habarlaidy ult.kz.
Politsiia qyzmetkerleri áleýmettik jelide jol qozǵalysy erejelerin óreskel buzǵan videosyn jariialaǵan áieldi anyqtap, jaýapqa tartty.
Videoda áieldiń qaýipsizdik beldigin taqpai kólik basqarǵany jáne bul talapty oryndaýdan ashyq bas tartqanyn baiqaýǵa bolady.
Tekserý barysynda ózge de zań buzýshylyqtar anyqtaldy. Áieldiń buǵan deiin sot sheshimimen kólik basqarý quqyǵynan aiyrylǵanyna qaramastan, rólge otyrǵany belgili boldy.
Osyǵan bailanysty oǵan qatysty birneshe ákimshilik quqyq buzýshylyq deregi boiynsha is qozǵaldy. Atap aitqanda, kólik basqarý quqyǵynan aiyrylǵannan keiin kólik júrgizý, qaýipsizdik beldigin paidalaný talabyn buzý, sot sheshimin oryndamaý jáne jalǵan aqparat taratý faktileri boiynsha materialdar rásimdeldi.
Jinaqtalǵan materialdar sotqa joldandy. Avtokólik arnaiy aiyppul turaǵyna qoiyldy.
Sonymen qatar kólik basqarý quqyǵynan aiyrylǵan adamǵa avtokóligin bergen kólik iesi de jaýapkershilikke tartyldy.
Politsiianyń ustanymy aiqyn: zań aldynda bári teń. Eshqandai tanystyq ta, bailanys ta, orynsyz málimdeme de zań talaptaryn buzýǵa negiz bola almaidy.
Ózin zańnan joǵary sanap, belgilengen talaptardy elemeýge eshkimniń quqyǵy joq. Zań bárine ortaq, al ony buzǵan adam jaýapkershilikten jaltara almaidy.
