2021 jylǵy 11 mamyrda 18 saǵat 20 minýtta Ridder qalasyndaǵy orman órti 287,4 ga alańda aýyzdyqtaldy. Bul týraly QR TJM resmi ókili Talǵat Ýáli habarlady, dep jazady Baq.kz agenttigi.
Órt 2021 jylǵy 10 mamyrda Shyǵys Qazaqstan oblysy, Ridder qalasynyń ákimshilik aýmaǵyndaǵy Leshoz kentinde saǵat 13.55-te ormanǵa jaiylǵan órtten týyndaǵan bolatyn. Jeldiń ekpini 20 m/s-qa deiin jetip, 5 kóshede 31 úi, 5 jeńil avtokólik jáne sharýashylyq qurylystarynyń 7 ýchaskesinde, sondai-aq TQS úi-jaiyn ot sharpyǵan. Órtengen úilerde 72 adam turǵan. Qazir 13 azamat jataqhanaǵa, qalǵandary týystarynyń úilerine ornalastyryldy. Órtti sóndirýge 493 jeke quram, 69 birlik tehnika, 2 tikushaq jumyldyryldy. Qazirgi ýaqytta Ridder qalasyna qarasty Leshoz kenti turǵyn úilerindegi órt tolyǵymen sóndirildi. 11 mamyrda "Qazaviaormanqorǵaý" tikushaǵymen áýeden barlaý jasaldy. Ushý nátijeleri boiynsha órttiń jalpy aýdany – 287,4 ga, onyń 272,4 ga – orman aimaǵy anyqtaldy. Quramynda 138 adam jáne 5 Orman sharýashylyǵy tehnikasy bar qaraýyldaý júrgiziledi - deidi resmi ókil.
Ridder qalasy ákiminiń qaýlysymen jergilikti aýqymdaǵy tótenshe jaǵdai jariialandy. Materialdyq shyǵyndy anyqtaý maqsatynda qalalyq ákimdiktiń zardap shekken turǵyn úi nysandaryn tekserý jónindegi komissiiasynyń jumysy uiymdastyryldy.
ShQO politsiia departamentiniń kúshimen tonaý faktileriniń jolyn kesý maqsatynda órt bolǵan jerde turǵyn úilerde kezekshilik uiymdastyryldy. ShQO TJD Daǵdarys ortalyǵynda jáne órt bolǵan jerde shtabtar ashylyp, 8(7232) 55-38-19 nómiri boiynsha zardap shekkender úshin jedel bailanys jelisi jumysyn jalǵastyrýda. ShQO TJD Jedel-qutqarý jasaǵynyń psihologtary men dárigerleri órt kezinde zardap shekken azamattarǵa kómek kórsetedi.
Halyqqa kómek kórsetý máselesi Shyǵys Qazaqstan oblysy ákiminiń turaqty baqylaýynda.
