2026–2027 oqý jylynda Qazaqstan oqýshylary qysqy demalysta 14 kún tynyǵady. Kanikýl 28 jeltoqsanda bastalyp, 2027 jylǵy 10 qańtarǵa deiin jalǵasady. Oqýshylar sabaqqa 11 qańtar, dúisenbi kúni oralady, dep habarlaidy ult.kz.
Oqý-aǵartý ministrligi bekitken kestege sáikes, biyl qysqy demalys ótken oqý jylymen salystyrǵanda tórt kúnge uzartylǵan. Byltyr oqýshylar 29 jeltoqsannan 7 qańtarǵa deiin, iaǵni 10 kún demalǵan edi.
Ekinshi toqsan segiz aptaǵa sozylady. Al qysqy kanikýldan keiin bastalatyn úshinshi toqsannyń uzaqtyǵy – 10 oqý aptasy.
Kelesi demalystar qashan bastalady?
Birinshi synyp oqýshylaryna 2027 jylǵy 8-14 aqpan aralyǵynda qosymsha bir aptalyq demalys beriledi.
Al barlyq synyp oqýshylarynyń kóktemgi kanikýly 22-28 naýryz aralyǵynda ótedi. Demalys jeti kúnge sozylady.
Tórtinshi toqsan segiz oqý aptasynan turady. 2026–2027 oqý jyly 25 mamyrda aiaqtalady.