Shyǵys Qazaqstan oblysynda alapat órtten baspanasyz qalǵandarǵa jazdyń sońyna deiin jańa úi beriledi, dep habarlaidy "Ult aqparat".
Aimaq basshysy Danial Ahmetov tilsiz jaýdan zardap shekken Ridder turǵyndarymen kezdesti. Óz sózinde ol tamyz aiynyń sońyna deiin baspanasyz qalǵandardyń árqaisysyna jańa úidiń kilti beriletindigin jetkizdi. Bes qurylys kompaniiasy Botanika yqshamaýdanynda jeti úiden turǵyzady.
Qazir oqiǵa ornynda komissiia músheleri jumys isteýde. Olar naqty keltirilgen materialdyq zalal mólsherin eseptep, azamattarǵa qujattaryn qalpyna keltirýge septigin tigizedi.
«Buzylǵan úilerdi qalpyna keltirmeimiz. Úiinen aiyrylǵan ár adamǵa 80 sharshy metrlik baspana beriledi. Áýelde qurylysy aiaqtalmaǵan 9 qabatty turǵyn úidi satyp alý josparlanǵan bolatyn. Alaida 1996 jylǵy úidiń ishi árlenbegen ári qajetti kommýnikatsiia tartylmaǵan. Onyń iesi sharshy metri úshin 179 myń teńge surap otyr. Al jeke sektordaǵy jańa úidiń sharshy metriniń quny – 160 myń teńge. Bul biýdjet qarjysyna da únem bolady. Úiler turǵyndarǵa esh aqysyz beriledi», - dedi Danial Ahmetov.
Qazirgi kezde sáýletshiler 35 úi aýmaǵyn bólýde, sosyn birden qurylys jumystary bastalmaq.
