Úndistanda kóz jumǵan 16 jastaǵy Suńqar Sábittiń uryǵyn Qazaqstanǵa jetkizý máselesi qoǵamda qyzý talqylanýda. Bul týraly jýrnalist Rýslan Ótepbai málimdedi, dep habarlaidy ult.kz.
Belgili bolǵandai, Qyzylorda oblysynyń turǵyny Suńqar Sábit atalyq beziniń qaterli isigin emdetý úshin anasymen birge Úndistannyń Deli qalasyna barǵan. Dárigerler himiialyq terapiiany bastamas buryn onyń bolashaqta áke ataný múmkindigin saqtaý maqsatynda uryǵyn arnaiy jaǵdaida qatyryp saqtaǵan.
Alaida jasóspirim qaterli isikten emes, júregindegi trombtyń jarylýy saldarynan 20 sáýir kúni qaitys bolǵan.
Qazir marqumnyń anasy Raihan Málikova ulynyń uryǵyn Qazaqstanǵa aldyrtyp, el aýmaǵynda saqtaýdy kózdep otyr. Onyń aitýynsha, bul máselede tiisti qoldaý qajet.
Jýrnalist Rýslan Ótepbai atalǵan máseleni sheshý úshin Úndistanǵa attanǵaly jatqanyn habarlady.
Aita keteiik, buǵan deiin Raihan Málikova em izdeý barysynda deldaldardyń qurbany bolǵanyn aityp, jumsalǵan qarajatqa qaramastan ulyna tolyqqandy em kórsetilmegenin málimdegen edi. Al Suńqar Úndistanǵa barǵannan keiin 12 kúnnen soń kóz jumǵan.
Óz kezeginde jasóspirimniń emdelýine kómektesken «Medical Travel» kompaniiasynyń ókilderi marqumnyń anasynan eshqandai qarajat almaǵandaryn málimdedi.
