Shymkentte 21 jastaǵy stýdent Nurai Serikbaidyń ólimine qatysty sot protsesi bastaldy. Sot otyrysynda 29 jastaǵy Sherhan Aimahannan jaýap alyndy, dep habarlaidy ult.kz Stan.kz-ke silteme jasap.
Sottalýshynyń aitýynsha, ol Nuraimen 2025 jyldyń jazynda tanysyp, qarym-qatynas qurǵan. Aimahan qyzǵa únemi aqsha aýdaryp, túrli syilyqtar bergenin jáne qazan aiynda oǵan úilenýge sheshim qabyldaǵanyn aitty.
Alaida 11 qańtarda jaǵdai kúrt ózgergen. Onyń sózinshe, sol kúni ol Nuraidy kezdesýge shaqyryp, qarym-qatynasty toqtatatynyn aityp, buryn bergen saqinany qaitarǵan.
"Aiyrylysyp jatyrmyz" desem, ol ashýlanyp, saqinany laqtyryp jiberdi. Nurai keýdemnen uryp, ádepsiz sózder aitty. Qaltada pyshaqtar baryn sezdim. Kishisin alyp shyǵyp, oǵan berdim de, "Urǵannan góri osyny tyq" dedim. Nurai pyshaq alyp, oń jaq búiirimnen urdy... Ári qarai ne bolǵany esimde joq", – dedi sottalýshy.
Aimahan sonymen birge Nuraidyń týystary olardyń qarym-qatynasynan habardar bolǵanyn jáne kezdesýlerine qarsy bolmaǵanyn málimdedi.
Nurai Serikbaidyń ólimi qańtar aiynda Shymkentte bolǵan. 21 jastaǵy stýdent pyshaq jaraqatynan oqiǵa ornynda kóz jumǵan. Tergeý barysynda kúdiktiniń buǵan deiin qyzdyń sońynan qalmai, tipti ony alyp qashqany da anyqtalǵan.
Osy faktiler boiynsha politsiia adam óltirý jáne stalking baptarymen qylmystyq is qozǵaǵan.
Keiin kúdiktiniń ýaqytsha ustaý izoliatorynan Talǵardaǵy psihikalyq densaýlyq ortalyǵyna aýystyrylǵany belgili boldy. Osydan keiin marqumnyń jaqyndary alańdaýshylyq bildirip, onyń psihikalyq aýrýy týraly anyqtama alyp, qylmystyq jaýapkershilikten qutylyp ketýi múmkin ekenin aitqan.
Alaida keiin ishki ister ministriniń orynbasary Sanjar Ádilov aiyptalýshyǵa júrgizilgen sot-psihiatriialyq saraptamanyń qorytyndysyn jariialady. Onyń aitýynsha, Sherhan Aimahan esi durys dep tanylyp, óz áreketine jaýap bere alatyny anyqtalǵan. Sondyqtan ol zań aldynda jaýap beredi.
Buǵan deiin Nurai Serikbaidyń otbasy sot otyrystaryn tikelei efirde kórsetýdi talap etken bolatyn.
