Qazaqstan musylmandary dini basqarmasynyń ókili Aǵabek Qonarbaiuly (QMDB) áleýmettik jelide keńinen talqylanǵan «mýzyka – haram, al ánshiler – shaitannyń azanshysy» degen málimdemege bailanysty resmi túsinikteme jariialady, dep habarlaidy ult.kz.
Dini basqarma mundai pikirlerdiń qoǵamda túsinbeýshilik týdyrǵanyn atap ótip, Islam dini adamdardy danalyqpen nasihat aitýǵa, aýyr sózden aýlaq bolyp, ózgeniń ar-namysyna qurmetpen qaraýǵa úndeitinin málimdedi.
QMDB málimetinshe, óner ókilderin jalpylama aiyptap, olarǵa aýyr sipattama berý durys emes. Sondai-aq áielderdi beiádep sózben kemsitý de Islam ádebine qaishy áreket ekeni atap ótildi.
Dini basqarma án máselesine de naqty túsinik berdi. Onda adamdy arsyzdyqqa, azǵyndyqqa jáne shariǵat tyiym salǵan isterge úndeitin ánderdiń quptalmaityny aitylǵan. Alaida Islam ǵalymdarynyń pikirine sáikes, din men dástúrdiń asyl qundylyqtaryn dáripteitin, Otandy qorǵaýǵa, ata-anany qurmetteýge, adamgershilik pen izgilikke shaqyratyn ánderdi oryndaýǵa jáne tyńdaýǵa ruqsat etiletini kórsetildi.
Osyǵan bailanysty QMDB azamattardy dini máselelerde tek resmi dini qyzmettegi bilikti mamandardyń túsindirmesine súienýge shaqyrdy.
«Qazaqstan musylmandary dini basqarmasy elimizdegi musylman qaýymyn, barsha halyqty árqashan ózara qurmetke, parasatqa, kórkem minezge jáne birlikke úndep keledi. Osy rette el azamattaryn sóz jaýapkershiligine den qoiýǵa, qoǵamnyń aýyzbirshiligin saqtaýǵa shaqyramyz», – delingen basqarma málimdemesinde.
Eske salaiyq, buǵan deiin Jetisai aýdanyndaǵy toida sóz sóilegen er adamnyń «mýzyka – haram», «ánshiler – shaitannyń azanshysy» degen pikiri áleýmettik jelide keń taralyp, qoǵamda qyzý talqylaýǵa sebep bolǵan edi. Keiin bul máselege Memlekettik keńesshi Erlan Qarin de pikir bildirip, Qazaqstannyń zaiyrly memleket ekenin jáne ulttyq bolmysqa qaishy áreketterge jol bermeý qajettigin atap ótken bolatyn.
