Qazaqstanǵa kirýge bes jylǵa tyiym salynǵan Ózbekstan azamaty elge atpen zańsyz ótip, Atyraýda intimdik qyzmet kórsetken, dep habarlaidy ult.kz.
Halyqstan Telegram arnasynyń jazýynsha, 26 jastaǵy áiel buǵan deiin Atyraýda turyp, aqyly intimdik qyzmet kórsetkeni úshin 2025 jyldyń tamyzynda Qazaqstannan shyǵarylǵan. Oǵan bes jyl boiy elge kirýge tyiym salynǵan.
Keiin Bishkekte júrgende Qazaqstanǵa zańsyz kirýge kómektesetin adammen tanysyp, oǵan 900 myń teńge tólegen. Áiel shekarany resmi ótkizý beketin ainalyp ótip, atpen kesip ótken.
Atyraýǵa jetken soń ol qaitadan páter jaldap, qyzmetin jalǵastyrǵan. Alaida ony uiymdasqan qylmysqa qarsy kúres basqarmasynyń qyzmetkerleri ustap, qylmystyq is qozǵaldy.
Sotta áiel kinásin moiyndap, elge qaita oralýyna materialdyq qiyndyq sebep bolǵanyn aitty.
Sot sheshimimen oǵan 1 jyl 6 ai bas bostandyǵynan aiyrý jazasy taǵaiyndaldy. Jazasyn ótegennen keiin ol Qazaqstannan shyǵarylyp, elge taǵy bes jyl kirýge tyiym salynady.
