Threads áleýmettik jelisinde arqasyna kýrerlik termosómke asynyp, qolyna sábiin kóterip júrgen áieldiń fotosy kópshiliktiń nazaryn aýdardy. Kadr qysqa ýaqyt ishinde keń tarap, jeli qoldanýshylary arasynda qyzý talqylanýda, dep habarlaidy ult.kz.
Jariialanym avtory sýrettegi áieldiń kim ekeni ázirge belgisiz ekenin aityp, ony taýyp, bailanys ornatýǵa kómektesýdi suraǵan. Onyń aitýynsha, áielge qoldaý kórsetkisi keletin adamdar sany kún saiyn artyp keledi.
Fotoda áieldiń bir qolymen nárestesin qushaǵyna qysyp, ekinshi jaǵynan jumysyn atqaryp júrgeni kórinedi. Bul kórinis kópshilikti beijai qaldyrmai, áleýmettik jelide myńdaǵan pikirdiń jazylýyna sebep boldy.
Kóptegen qoldanýshy áielge qarjylai kómek kórsetýge daiyn ekenin bildirse, keibiri balalar kiimi, azyq-túlik jáne basqa da qajetti zattarmen kómektesýge nietti ekenin jazǵan. Sondai-aq sýrettegi áieldi tanityn jandardan habarlasý suralǵan.
Jelide onyń ómirlik jaǵdaiyna qatysty túrli boljamdar aitylyp jatyr. Qoldanýshylar áieldiń sábiimen birge jumys isteýine qandai sebepter áser etkenin bilgisi keletinderin jetkizýde.
Ázirge áieldiń jeke basy men jaǵdaiyna qatysty resmi aqparat jariialanǵan joq. Soǵan qaramastan, áleýmettik jeli qoldanýshylary oǵan qoldaý kórsetý maqsatynda jazbany bólisip, izdeý jumystaryn jalǵastyryp jatyr.
