Qazaqstanda seksýaldyq zorlyq-zombylyqqa qatysty qylmystyq isterdi endi negizinen áiel tergeýshiler júrgizetin bolady. Bul týraly Stan.kz aqparat agenttigine silteme jasap ult.kz habarlaidy.
Májilis kýlýarynda ishki ister ministriniń orynbasary Sanjar Ádilov Qazaqstanda seksýaldyq zorlyq-zombylyq isterin áiel tergeýshiler qaraitynyn málimdedi.
Onyń aitýynsha, jańashyldyq jábirlenýshilerdiń qosymsha psihologiialyq kúizeliske ushyraýyn azaitýǵa jáne tergeý organdaryna degen senimdi arttyrýǵa baǵyttalǵan.
Sonymen qatar ishki ister ministrliginde Qylmystyq kodekske engizilgen neke qiiýǵa májbúrleý týraly jańa baptyń qalai qoldanylatyny túsindirildi. Sanjar Ádilovtiń sózinshe, mundai isterde jábirlenýshi retinde áiel de, er adam da tanyla alady. Alaida áieldiń júkti bolýyna bailanysty nemese basqa sebeptermen nekege turýdy talap etýdiń ózi qylmys quramyn qalyptastyrmaidy.
"Eger klassikalyq jaǵdaidy alsaq, áiel ózine úilenýdi talap etken kezde onyń nemese jaqyndarynyń tarapynan qorqytý, kúsh kórsetý nemese qysym jasaý faktileri bolýy tiis. Al mundai áreketter bolmasa, bul azamattyq-quqyqtyq qatynastar sanalady", – dedi ol.
Vedomstvonyń málimetinshe, qazir Qazaqstanda neke qiiýǵa májbúrleý babymen áiel kúdikti retinde tanylǵan birde-bir qylmystyq is tirkelmegen.
2025 jylǵy qyrkúiekten bastap Qazaqstanda nekege májbúrleý resmi túrde qylmystyq quqyq buzýshylyq retinde tanyldy.
Sondai-aq elimizde stalking (adamdy qýdalaý, ańdý) úshin qylmystyq jaýapkershilik engizildi. Biyl stalkingke qatysty 83 qylmystyq is sotqa joldanǵan.
Eske salaiyq, buǵan deiin Qazaqstanda turmystyq zorlyq-zombylyq úshin jaýapkershilikti kúsheitetin zań qabyldanǵan edi. Memleket basshysy áielder men balalardyń quqyqtaryn qorǵaýǵa baǵyttalǵan zańǵa qol qoiyp, otbasylyq-turmystyq zorlyq-zombylyqtyń aldyn alý sharalaryn kúsheitýdi tapsyrdy. Osyǵan bailanysty ishki ister áielder men balalarǵa qatysty zorlyq-zombylyq isterimen ainalysatyn mamandandyrylǵan áiel qyzmetkerler men tergeýshiler sanyn arttyrý jumystaryn qolǵa aldy.
