Qazaqstanda «Jyldyń 10 úzdik oqyrmany» respýblikalyq kitap marafony bastaldy. Jobanyń 10 jeńimpazynyń árqaisysyna 10 million teńgeden aqshalai syilyq beriledi, dep habarlaidy ult.kz.
Bul týraly Mádeniet jáne aqparat ministri Arman Qyryqbaev málimdedi.
Memleket basshysynyń tapsyrmasymen 1 qyrkúiekte bastalǵan joba búginde eldiń 195 aýdany men 87 qalasyn qamtyǵan. Eki aptanyń ishinde arnaiy platformaǵa 1 millionnan astam adam tirkelgen.
Qatysýshylar oqýshylar men stýdentterden bastap, muǵalimder, ǵalymdar jáne memlekettik qyzmetshilerge deiingi segiz sanat boiynsha baq synaidy.
Marafonnyń negizgi sharty – alty ai ishinde 15 kitap oqyp, keiin intellektýaldyq synaqtardan ótý jáne shyǵarmalardyń mazmunyn jaqsy meńgergenin kórsetý.
Óńirlik kezeńderdiń jeńimpazdary arasynan shamamen 4 myń adam aqshalai syilyq alady. Al marafonnyń basty 10 jeńimpazy finalda anyqtalady.
Jobanyń qorytyndysy 23 sáýir – Ulttyq kitap kúni qarsańynda shyǵarylady.
«Úzdik on qatysýshynyń árqaisysyna 10 million teńge kóleminde arnaiy syilyq beriledi. Qoǵamnyń marafonǵa degen qyzyǵýshylyǵynyń joǵary bolǵany qýantady», – dedi Arman Qyryqbaev.
Ministrdiń ózi «Parasat» arnaiy sanatyna tirkelgen. Bul sanatta qatysýshylar kóshbasshylyq, basqarý jáne memleketke qyzmet etý taqyryptaryndaǵy 15 kitapty oqýy kerek. Alaida atalǵan sanatta aqshalai syilyq qarastyrylmaǵan.
Qyryqbaev áriptesterin – ministrlerdi, depýtattar men ákimderdi oqityn ult qalyptastyrý bastamasyn jeke úlgisimen qoldaýǵa shaqyrdy.
