Qazaqstanda ádebiet, kitap shyǵarý jáne kitap oqýdyń tsifrlyq tehnologiialary salasyndaǵy 10 jobaǵa jalpy somasy shamamen 50 mln teńge grant bólinedi, dep habarlaidy ult.kz Kreativti indýstriialardy damytý qoryna silteme jasap.
Konkýrsqa barlyǵy 172 ótinim túsken. Irikteý qorytyndysy boiynsha 10 joba jeńimpaz atandy. Árqaisysyna 5 mln teńgege deiin grant qarastyrylǵan.
Qoldaý tapqan jobalar qatarynda qazaq tilindegi tsifrlyq kitaphanalar men oqý platformalaryn qurý, balalarǵa arnalǵan kitaptar men komikster shyǵarý, sondai-aq jasandy intellekt kómegimen interaktivti bilim berý quraldaryn ázirleý bastamalary bar.
Atap aitqanda, «Sóz-Qazyna», Oqiber, «Bir bettik kitap: Qazaq ertegileri», Satti.asia, «Tátti ertegi», Abai Library, «Tulga», Compara jobalary, qazaqstandyq komikster toptamasy jáne «Dombyra úirengim keledi» jobasy grant ielendi.
Bastamalardyń negizgi maqsaty – otandyq ádebiettiń qoljetimdiligin arttyrý, qazaq tilindegi sapaly kontentti kóbeitý jáne balalar men jastardyń kitap oqýǵa qyzyǵýshylyǵyn oiatý. Sonymen qatar tsifrlyq tehnologiialar arqyly ulttyq mádenietti dáripteý kózdelgen.
