Biyl «Máńgilik bala beine» shyǵarmasyna 30 jyl tolady. Mereitoi qarsańynda shyǵarma erekshe janrda jaryqqa shyqty, dep habarlaidy ult.kz.
Semei poligonynyń zardabyn qasiretti taǵdyr arqyly sýretteitin bul shyǵarma osy ýaqyt ishinde óner súier qaýymnyń júreginen oryn alyp, óziniń oqyrmanyn da, kórermenin de qalyptastyrdy.
Eger táýelsizdigimizdi almaǵanda «Máńgilik bala beine» siiaqty shyǵarma jazylmaityn edi. Shyǵarma avtory Memlekettik syilyqtyń laýreaty Roza Muqanova ult.kz tilshisine bergen suqbatynda osylai dedi.
Joly bolǵan shyǵarma
«Táýelsizdikke deiin qazaq ádebietinde qanshama jabyq taqyryptar boldy. Al biz táýelsizdik alǵan kezde múmkindik zor boldy. Burynǵy ketken esemizdi qaitarýǵa bizge múmkindik týdy. Ádebiette oqyrmanǵa, kórermenge aitylmaǵan aqiqatty ashatyn kezde bizge táýelsizdik berdi», - dedi Roza Muqanova.
Roza Muqanova «Máńgilik bala beineni» joly bolǵan shyǵarma dep esepteidi.
«Sebebi ol meniń eń alǵashqy shyǵarmam edi. Keiinnen bilesizder, osy shyǵarmanyń negizinde pesa jazdym. Ony áigili rejisserimiz, reformator rejisserimiz Bolat Atabaev sahnaǵa qoidy. «Máńgilik bala beine» 30 jyl boiy repertýarda kele jatqan shyǵarma. Munan keiin qazaqtyń kórnekti, ataqty kinorejisseri Satybaldy Narymbetov «Qyz jylaǵan» degen kino túsirdi. Bul kino álemge shyǵaryldy, álem festivaldaryna baryp halyqaralyq júldelerge ie boldy», - dedi shyǵarma avtory.
Spektakl-kitapta oqyrman ár keiipkerdi kóre alady
Endi mine «Máńgilik bala beine» shyǵarmasy qazaq jáne aǵylshyn tilderinde spektakl-kitap formatynda jaryqqa shyǵyp, jańa tynys aldy.
Spektakl-kitaptyń tusaýkeseri Astanadaǵy Ulttyq akademiialyq kitaphanada ótti.
Osy ýaqytqa deiin mundai janrda úlken shyǵarma shyqpaǵan eken. Ony tuńǵysh ret «ARMAN-PV» baspasynyń bas direktory Didara Alina bastamashylyq etip, Roza Muqanovanyń «Máńgilik bala beine» shyǵamasyn spektakl-kitap retinde shyǵarǵan.
Spektakl-kitaptyń ereksheligi — shyǵarmadaǵy keiipkerler grafikalyq sýretpen salynýynda. Roza Muqanovanyń aitýynsha, oqyrman kitapty oqyp otyrǵan kezde ár keiipkerin kóre alady.
«Qatirany da, Shókishti de, Qumardy da jáne ár keiipkerdiń obrazy ashylǵan», - deidi ol.
Bul kitaptyń shyǵýyna úlken úles qosqan kórinekti sýretshi Almas Syrǵabaev ekenin aityp otyr avtor.
«Kez kelgen isti bastaityn kezde shyǵarmanyń ári qarai ómirsheń bolýyna úlken bir komanda jumys isteidi. Mysaly, teatrǵa qoiylǵan kezde shyǵarmanyń halyqqa unaýyna kompozitordyń eńbegi, akterler men rejisserdiń eńbegi óz úlesin qosady. Dál solai búgingi spektakl-kitapta da tek qana avtordyń eńbegi emes, baspanyń da, sýretshiniń de eńbegin aitý lazym», - dedi suqbattasymyz.
Álemge jol tartqan shyǵarma
Aita keteiik, biyl Germaniiada ótken halyqaralyq kitap kórmesinde kitaptyń aǵylshyn tilindegi aýdarmasy usynyldy. Bul qazaq ádebietiniń marjany sanalatyn Roza Muqanovanyń shyǵarmasyn álemdik óner súier qaýymǵa tanystyrýdyń taǵy bir múmkindigi boldy.
«Men osy arqyly ózimniń oqyrmandarymdy, zertteýshilerimdi, aýdarmashylarymdy taptym», - deidi R. Muqanova.
Jalpy «Máńgilik bala beine» Birikken Ulttar Uiymynyń alty tiline aýdarylyp, álemniń túkpir-túkpirindegi ǵalymdar zerttep, taldap keledi.
