Qaraǵandy oblysynda jyl basynan beri politseiler joǵalǵan 322 bas maldy taýyp, ielerine qaitardy. Alaida maldyń joǵalýynyń bári birdei urlyqqa bailanysty emes. Kei jaǵdaida tórt túliktiń qaraýsyz qalýy men ieleriniń salǵyrttyǵy da osyndai jaǵdailarǵa sebep bolyp otyr, dep habarlaidy ult.kz.
Jyl basynan beri politsiiaǵa mal urlyǵy boiynsha 80 aryz túsken. Júrgizilgen izdestirý sharalary barysynda 53 jaǵdaida joǵalǵan maldyń orny anyqtaldy. Nátijesinde barlyǵy 322 bas mal tabyldy.
Sonymen qatar politseiler mal urlyǵynyń 15 deregin ashyp, urlanǵan 86 bas maldy ielerine qaitardy. Qylmys jasady degen kúdikpen 11 adam ustalyp, alty qylmystyq toptyń zańsyz áreketine tosqaýyl qoiyldy.
Mal urlyǵynyń aldyn alý jáne onyń jolyn kesý maqsatynda politsiia mal tasymalyna baqylaýdy kúsheitti. 25 qyrkúiekten bastap oblystyq jáne respýblikalyq mańyzy bar avtojoldarda 19 jyljymaly blokbeket jumys istep tur. Onda politseiler mal tasymaldaityn kólikterdi tekserip, tasymaldyń zańdylyǵy men qajetti qujattardyń bolýyna erekshe nazar aýdarady.
Bul sharanyń tiimdiligi buǵan deiin de dáleldengen. Ótken jyly jyljymaly blokbeketterdiń kómegimen Aqmola oblysynyń aýmaǵynda urlanǵan 40 bas jylqyny aidap áketý deregi ashyldy.
Qaraǵandy oblysy politsiia departamenti bastyǵynyń orynbasary Jasqairat Qaiyrov maldyń joǵalýyna keide ieleriniń ózderi de sebep bolatynyn atap ótti.
– Aýyl turǵyndary úshin mal – jai ǵana múlik emes, kúndelikti eńbektiń jemisi ári otbasynyń negizgi tabys kózi. Sondyqtan mal joǵalǵany týraly árbir habarlamaǵa jedel den qoiyp, izdestirý jumystaryn júrgizemiz. Mal bolýy múmkin aýmaqtardy tekserip, onyń yqtimal qozǵalys baǵyttaryn anyqtaimyz. Degenmen keibir mal ieleri tórt túligin qaraýsyz qaldyryp, jaiylymǵa baqtashysyz jiberedi. Maldyń qaida júrgenin baqylamaidy. Sonyń saldarynan janýarlar joǵalady. Mal ielerin óz sharýashylyǵyna jaýapkershilikpen qaraýǵa shaqyramyz. Tórt túlikti qaraýsyz qaldyrmai, jaiylymdy uiymdastyrý, baqtashynyń baqylaýyn qamtamasyz etý jáne mal ustalatyn oryndardy qadaǵalaý qajet. Kúdikti jaǵdailar baiqalsa, politsiiaǵa der kezinde habarlaǵan jón, – dedi Jasqairat Qaiyrov.
Politsiia mal urlyǵynyń aldyn alý jumystary turaqty túrde jalǵasatynyn eske salady. Sonymen qatar turǵyndardy maldy qaraýsyz qaldyrmaýǵa, jaiylym men qoradaǵy qaýipsizdikke mán berýge shaqyrady. Óitkeni qarapaiym saqtyq sharalary maldyń joǵalýynyń aldyn alyp qana qoimai, politsiianyń basqa da mańyzdy mindetterine kúsh jumyldyrýyna múmkindik beredi.
