1990-jyldary ánderimen tanylǵan almatylyq mýzykant, ánshi ári án avtory Kirill Li qaitys boldy, dep habarlaidy ult.kz.
Qaraly habardy Májilistiń burynǵy depýtaty Táńirbergen Berdońǵar áleýmettik jelidegi paraqshasynda jetkizip, óner iesiniń videosyn jariialady.
Kirill Li tyńdarmanǵa “Karina”, “Dojd”, “Milashka-maloletka” ánderimen jáne Almatyǵa arnalǵan “Alma-Ata” týyndysymen tanys.
Last.fm platformasyndaǵy málimetke sáikes, ánshi suhbattarynyń birinde shyǵarmashylyǵyna “Laskovyi mai” tobynyń yqpaly bolǵanyn aitqan. Ol toptyń mýzykasynan shabyt alyp, án oryndaýda solarǵa uqsas mánerdi qoldanǵan.
2002 jyldan bastap Kirill Li teledidardan sirek kórine bastaǵan. Keiin bolashaq jarymen tanysyp, ekeýi sahnada birge óner kórsetken.
Densaýlyǵyna bailanysty sahnadan ketken soń, jarnama jáne prodiýserlik salasyna bet burǵan. Soǵan qaramastan án jazýyn jalǵastyrǵan.
