Qazaqstan jylqy sany boiynsha álemde tórtinshi orynǵa kóterildi. Bul týraly Ranking.kz BUU-nyń Azyq-túlik jáne aýyl sharýashylyǵy uiymynyń (FAO) derekterine súiene otyryp habarlady, dep habarlaidy ult.kz.
Álemdegi jylqy sany eń kóp elderdiń alǵashqy bestigi mynadai:
- Meksika — 6,4 mln bas;
- Braziliia — 5,7 mln bas;
- Mońǵoliia — 4,7 mln bas;
- Qazaqstan — 4,4 mln bas;
- Qytai — 3,5 mln bas.
Bul rette Qazaqstandaǵy jylqy sany 2025 jylǵa qarai 4,6 mln basqa jetken.
Ortalyq Aziiada Qazaqstan kósh bastap tur
Qazaqstan jylqy sany boiynsha Ortalyq Aziia elderiniń arasynda aiqyn kósh bastap keledi. Máselen, Qyrǵyzstan álemdik reitingte 17-orynda — 553,5 myń bas, Ózbekstan 30-orynda — 283 myń bas, Tájikstan 51-orynda — 92 myń bas. Al Túrikmenstanda jylqy sany 27,6 myń basty quraidy.
Qazaqstanda 2020-2025 jyldar aralyǵynda jylqy sany 48,4 paiyzǵa ósken. Iaǵni bes jyl ishinde kórsetkish 3,1 mln bastan 4,6 mln basqa deiin artqan. Salystyrmaly túrde Qyrǵyzstanda osy kezeńdegi ósim nebári 4,9 paiyz bolǵan.
Jylqy eń kóp shoǵyrlanǵan óńirler
Qazaqstannyń barlyq óńirinde jylqy sharýashylyǵy damyǵan. Jylqy sany boiynsha kósh bastap turǵan oblystar:
- Túrkistan oblysy — 499,9 myń bas;
- Abai oblysy — 409,3 myń bas;
- Aqtóbe oblysy — 399,7 myń bas;
- Qaraǵandy oblysy — 399 myń bas.
Mamandar saladaǵy ósimdi Qazaqstannyń keń jaiylymdyq jerlerimen qatar, memlekettik qoldaý men investitsiianyń artýymen bailanystyrady.
Máselen, jylqy ósirý salasyna negizgi kapitalǵa salynǵan investitsiia kólemi 2020 jyly 3,5 mlrd teńge bolsa, 2025 jyly 26,2 mlrd teńgege jetken. Al eń joǵary kórsetkish 2023 jyly tirkelip, 49 mlrd teńgeni quraǵan.
Qazaqstannyń jylqy sharýashylyǵyndaǵy bul kórsetkishter el sportshylarynyń kóshpendiler oiyndaryndaǵy jetistikterimen de úndesip otyr. IV Dúniejúzilik kóshpendiler oiyndarynda Qazaqstan quramasy 74 medal, onyń ishinde 32 altyn jeńip alyp, at sporty túrlerinde úzdik nátije kórsetken.
