23 qazan, Astana. Qazaqstan Halyq Keńesiniń Tóraǵasy Erlan Qoshanov Respýblika kúni qarsańynda Memleket basshysy Qasym-Jomart Kemeluly Toqaevtyń atynan birqatar qazaqstandyqqa memlekettik nagrada tapsyrdy. Osy kúni Halyq Keńesi janynan qurylǵan «Birlik» qoǵamdyq tobynyń alǵashqy otyrysy da ótti. Bul alań konstitýtsiialyq organnyń quramyna enbegen, elimizdiń barlyq óńirindegi etnomádeni birlestikterdiń ókilderin biriktirdi.
Qatysýshylar aldynda sóz sóilegen Erlan Qoshanov Respýblika kúniniń tarihi mańyzyn atap ótip, 25 qazannyń egemen Qazaqstannyń qalyptasýyndaǵy rólin eske saldy.
«Memleket basshysy Qasym-Jomart Kemeluly Toqaevtyń bastamasymen Respýblika kúni ulttyq mereke mártebesin qaita aldy. Bul sheshim elimizdiń damýyndaǵy jańa kezeńmen sabaqtasty. Egemendigimizdiń bastaýyna jańasha qarap, onyń qadirin tereńirek túsinýge jol ashty», – dedi Erlan Qoshanov.
Qazaqstan Halyq Keńesiniń Tóraǵasy Táýelsizdik jyldaryndaǵy elimizdiń jetistikterine toqtalyp, Qazaqstannyń halyqaralyq bedeliniń nyǵaiǵanyn jáne áleýmettik-ekonomikalyq ózgeristerdiń nátijelerin atap ótti. Onyń aitýynsha, búginde Qazaqstan jahandyq máselelerdi sheshýge belsendi qatysatyn orta derjava retinde tanyldy.
Foto: Qazaqstan Halyq Keńesi baspasóz qyzmeti
Foto: Qazaqstan Halyq Keńesi baspasóz qyzmeti
Foto: Qazaqstan Halyq Keńesi baspasóz qyzmeti
Sońǵy jeti jylda elimizdiń ekonomikasyna 155 mlrd dollar sheteldik investitsiia tartyldy. Jan basyna shaqqandaǵy JIÓ 15 myń dollarǵa jetti. Osy kezeńde 118 mln sharshy metr turǵyn úi paidalanýǵa berilip, 36,3 myń shaqyrym avtomobil joly salynyp, jóndeýden ótti. 1300-den astam mektep, 1483 balabaqsha jáne 1259 meditsinalyq mekeme ashyldy. 2024 jyly Moody’s halyqaralyq reitingtik agenttigi Qazaqstanǵa óz tarihyndaǵy eń joǵary kredittik reitingti «Turaqty» boljamymen berdi. Bul reiting biyl da rastaldy.
Memlekettiń damýyndaǵy qundylyqtyq negizder týraly aita kele, Erlan Qoshanov qoǵamdyq kelisimdi nyǵaitýda mańyzdy baǵdar bolyp sanalatyn Memleket basshysynyń «Birligimiz – áralýandyqta» qaǵidatyna nazar aýdardy.
«Birlik degenimiz – ártúrli bola otyryp, bir-birimizdiń tarihymyzdy qurmetteý jáne elimizdiń bolashaǵy úshin ortaq jaýapkershilikti seziný. Bul birlikti odan ári nyǵaityp, elimizdiń yntymaǵyn arttyrý úshin ortaq adamgershilik qundylyqtarǵa súiený mańyzdy», – dedi Erlan Qoshanov.
Halyq Keńesiniń Tóraǵasynyń aitýynsha, bul qundylyqtar Memleket basshysynyń zańǵa qurmet, ádildik jáne el bolashaǵy úshin jaýapkershilik qaǵidattaryna negizdelgen «Zań jáne tártip», «Adal azamat» jáne «Taza Qazaqstan» bastamalarymen úndesedi.
Odan ári Erlan Qoshanov etnomádeni birlestikterdiń qoǵamdyq senimdi nyǵaitýǵa, etnosaralyq kelisimdi saqtaýǵa jáne Prezident bastamalaryn ilgeriletýge qosyp otyrǵan úlesine nazar aýdardy. Onyń aitýynsha, Halyq Keńesi janynan qurylǵan «Birlik» toby ózara is-qimyldy keńeitip, birlestikter ókilderin jalpyulttyq máselelerdi talqylaý úderisine belsendirek tartýǵa múmkindik beredi.
«Sizder Halyq Keńesiniń qurylýymen etnosaralyq kelisim máselelerine ǵana emes, jalpyulttyq mindetterdi sheshýge de belsendi qatysýǵa múmkindik alasyzdar. Bastamalar kóterip, halyqty tolǵandyratyn máselelerdi ortaǵa salyp, búkil el úshin mańyzdy sheshimderdi talqylaýǵa qatysasyzdar. Biz «Birlik» tobyn dál osy maqsatta quryp otyrmyz», – dedi Erlan Qoshanov.
Toptyń úsh negizgi baǵyt boiynsha júrgiziledi. Birinshisi – etnomádeni birlestikterdiń halyqpen jumys isteý tájiribesine súiene otyryp, qoǵamdyq mańyzy bar máselelerdi sheshýge qatysýy. Ekinshisi – jastar bastamalaryn qoldaý jáne jas urpaqty qoǵamdyq ómirge belsendi tartý. Úshinshisi – áleýmettik jeliler men aqparattyq jobalar arqyly birlik pen kelisim ideialaryn ilgeriletý.
Jiynda Erlan Qoshanov ulyq mereke qarsańynda elge eńbegi sińgen azamattarǵa qurmet kórsetý jaqsy dástúr ekenin, bunyń Respýblika kúni qarsańynda erekshe mańyzǵa ie ekenin atap ótti.
«Búgin Memleket basshysy Qasym-Jomart Kemeluly Toqaev birqatar otandastarymyzǵa joǵary memlekettik nagradalar tabys etti. Marapattalǵandardyń arasynda bizdiń áriptesterimiz de bar. Birqatary marapatyn Prezidenttiń qolynan aldy. Barshańyzdy osy qýanyshpen shyn júrekten quttyqtaimyn! Bul – el igiligi jolyndaǵy adal eńbekterińizge berilgen joǵary baǵa», – dedi.
Prezidenttiń atynan Erlan Qoshanov belsendi azamattyq ustanymy jáne qoǵamdyq-saiasi saladaǵy jemisti eńbegi úshin azamattarǵa memlekettik nagradalar tabystady.
