Qazaqstan energetika ministrliginiń baspasóz qyzmetiniń habarlaýynsha, Resei úkimetinen otyn satyp alý jóninde resmi ótinish ázirge túspegen, dep habarlaidy ult.kz.
Alaida túsken jaǵdaida Qazaqstan “ózara tiimdi kommertsiialyq sharttar negizinde janar-jaǵarmai materialdaryn jetkizý múmkindigin qarastyrýǵa daiyn”.
“Qazaqstannyń ishki naryǵyn tolyq ári úzdiksiz qamtamasyz etý – sózsiz basymdyq bolyp qala beredi. Eksporttyq jetkizilimder azamattar men el ekonomikasynyń qajettilikterin qamtamasyz etýge qaýip tónbegen jaǵdaida ǵana júzege asyrylýy múmkin” dep jazylǵan ministrliktiń habarlamasynda.
Buǵan deiin Reuters saladaǵy tórt derekkózge súiene otyryp, Qazaqstan shilde-tamyzda Reseige 50 myń tonna benzindi gýmanitarlyq kómek retinde jetkizýge kelisti dep jazǵan edi. Qazaqstan energetika ministrligi aqparat agenttigine Resei úkimetinen janarmaidy gýmanitarlyq kómek retinde jetkizý týraly resmi suranys túspegenin aitqan.
Degenmen ministrlik Reseidiń "Tatneft" munai kompaniiasy jetkizetin naftany (tikelei aidalǵan benzindi) óńdeitin Batys Qazaqstan oblysyndaǵy "Kondensat" zaýytynan janarmai jetkizilýi múmkin ekenin joqqa shyǵarmaǵan.
"Kondensat" JShS óndiretin avtokólik benzinin jaqyn arada Reseige jetkizý múmkindigi Qazaqstannyń ishki naryǵyndaǵy munai ónimderiniń jetkiliktilik deńgeiine bailanysty bolmaq. Mundai jetkizilim júzege asyrylsa, avtokólik benzini Reseidiń "Tatneft" kompaniiasy beretin shikizattan óndiriledi", — delingen agenttikke berilgen jaýapta.
Aqparat agenttiginiń habarlaýynsha AI-95 jáne AI-92 markaly benzinderi Batys Qazaqstan oblysyndaǵy "Kondensat" zaýytynan jáne Pavlodardaǵy munai óńdeý zaýytynan jóneltilýi tiis.
