Qazaqstan qatarynan ekinshi jyl Ózbekstan naryǵyna ósimdik maiyn jetkizetin eń iri eksporttaýshy el bolyp otyr.
2025 jylǵy qyrkúiek pen 2026 jylǵy mamyr aralyǵynda Qazaqstannyń mai-tońmai ónimderiniń Ózbekstanǵa eksporty 553 myń tonnaǵa jetti. Bul ótken marketingtik jyldyń sáikes kezeńimen salystyrǵanda 130,8 myń tonnaǵa nemese 31%-ǵa artyq.
2025 jyldyń qorytyndysy boiynsha Qazaqstannyń Ózbekstandaǵy ósimdik maiy naryǵyndaǵy úlesi 90%-dan asty. Sońǵy bes maýsym boiy jetkizilim kólemi turaqty túrde ósip keledi.
Sonymen qatar, mai-tońmai salasy ónimderiniń jalpy eksport kólemi de artyp otyr. Marketingtik jyldyń toǵyz aiynda Qazaqstan shetel naryǵyna ósimdik maiyn, shrot pen kúnjarany 944 mln AQSh dollary kóleminde eksporttady.
Eksporttan túsken tabys 2024/2025 marketingtik jylynyń qyrkúiek–mamyr kezeńimen salystyrǵanda 331 mln AQSh dollaryna nemese 54%-ǵa ósti. Boljam boiynsha, aǵymdaǵy marketingtik jyldyń sońyna qarai ósimdik maiy, shrot pen kúnjara eksportynyń kólemi 1,15 mlrd AQSh dollarynan asady.
Syrtqy naryqqa jetkizilimniń ulǵaiýyna eldegi qaita óńdeý salasynyń damýy yqpal etýde. Qazirgi tańda Qazaqstanda maily daqyldardy óńdeý qýaty jylyna 5,2 mln tonnadan asady. Onyń ishinde kúnbaǵys óńdeý qýaty 4,4 mln tonnany quraidy. Bul Ózbekstandaǵy jalpy óńdeý qýatynan 700 myń tonnaǵa artyq.
Jańa kásiporyndardy iske qosý jáne salý esebinen 2028 jylǵa qarai Qazaqstannyń mai-tońmai salasynyń óńdeý qýatyn jylyna 8 mln tonnaǵa deiin jetkizý josparlanyp otyr.
Qazaqstannyń mai-tońmai ónimderi búginde álemniń 20-dan astam eline eksporttalady. Sondai-aq elimiz Ortalyq Aziia memleketteriniń kúnbaǵys shroty boiynsha suranysyn tolyq qamtamasyz etip, kúnbaǵys maiyn eksporttaý kólemi jóninen álemde altynshy orynda tur.
Aldaǵy ýaqytta sala álemdegi kúnbaǵys maiyn eksporttaityn jetekshi úsh eldiń qataryna qosylyp, eksporttyq túsimdi 2 mlrd AQSh dollaryna deiin jetkizýdi kózdep otyr.
