Qazaqstanǵa kelgen OpenAI delegatsiiasy Premer-Ministrdiń orynbasary – Jasandy intellekt jáne tsifrlyq damý ministri Jaslan Mádievmen kezdesti, dep habarlaidy ult.kz.
Taraptar jasandy intellekt salasyndaǵy yntymaqtastyqty damytý, birlesken bilim berý jobalaryn iske asyrý jáne ChatGPT Edu platformasyn engizý máselelerin talqylady.
Kezdesý barysynda OpenAI ókilderi Qazaqstandaǵy jasandy intellektti paidalaný deńgeiine qatysty zertteý nátijelerin tanystyrdy. Oǵan sáikes, Qazaqstan Ortalyq Aziiadaǵy jasandy intellekt quraldaryn paidalanýda kóshbasshy elderdiń biri sanalady.
Zertteý málimetinshe, qazaqstandyqtar ChatGPT-di kóbine praktikalyq nusqaýlyqtar alý (32,8%), mátin jazý jáne óńdeý (25%), sondai-aq aqparat izdeý (18%) úshin qoldanady. Paidalanýshylardyń negizgi bóligin 18-34 jas aralyǵyndaǵy jastar quraidy. Bul jas sanaty barlyq suranystardyń 72 paiyzyn qamtidy.
Jaslan Mádievtiń aitýynsha, zertteý nátijeleri qazaqstandyqtardyń jańa tehnologiialardy kúndelikti ómirde belsendi paidalanyp otyrǵanyn kórsetedi.
«Azamattar jasandy intellektti bilim alý, jumys mindetterin oryndaý, aqparat izdeý jáne kontent jasaý úshin keńinen qoldanyp júr. Bul Qazaqstannyń óńirdegi tehnologiialyq kóshbasshy retindegi pozitsiiasyn nyǵaitýǵa múmkindik beredi», – dedi ministr.
OpenAI-diń bilim berý salasyndaǵy halyqaralyq baǵytynyń jetekshisi Valeri Fokke Qazaqstanda ChatGPT paidalaný deńgeii halyqaralyq kórsetkishter boiynsha joǵary ekenin atap ótti.
Onyń sózinshe, kelesi kezeńde jasandy intellekt quraldaryn tiimdi ári jaýapty qoldaný daǵdylaryn damytýǵa basymdyq beriledi.
Aita keteiik, Qazaqstanda júzege asyrylyp jatqan ulttyq joba aiasynda elimizdegi 165 myń pedagog arnaiy bilim berý uiymdaryna arnalǵan ChatGPT Edu nusqasyna qol jetkizedi. Jobanyń tehnologiialyq seriktesi – Bilim Group. Kompaniia OpenAI sheshimderin mektepter, kolledjder jáne joǵary oqý oryndarynyń bilim berý protsesine engizýmen ainalysady.
OpenAI delegatsiiasynyń sapary Qazaqstanda jasandy intellektti bilim berý júiesine keńinen engizýge baǵyttalǵan ulttyq bastama aiasynda uiymdastyryldy.
