MýzArt tobynyń ánshisi Sáken Maiǵaziev Izrailge sapary kezinde ómirine qaýip tóngen sátti eske aldy. Onyń aitýynsha, qasietti Ál-Aqsa meshitine barǵan kezde Izrail áskeri men musylmandar arasynda shielenisti jaǵdaidyń kýási bolǵan, dep habarlaidy ult.kz.
Óner iesiniń sózinshe, meshitke kirý kezinde qaýipsizdik sharalary kúsheitilip, jastardyń kirýine shekteý qoiylǵan. Osy sátte jinalǵan jurt pen áskeriler arasynda qaqtyǵys týyndaǵan.
Sáken Maiǵaziev sol kezdegi kóńil kúiin aityp, týǵan-týystary men otbasyn oilap, qatty alańdaǵanyn jetkizdi. Onyń janynda arab tilin meńgergen Amangeldi Erenǵaiyp bolǵan.
Ánshiniń aitýynsha, jaǵdai ýshyǵa túsken kezde olar ózderiniń Qazaqstannan kelgen týrist ekenin aityp, el ataýyn ataǵan. Osydan keiin áskeri qyzmetkerler olarǵa kedergi keltirmegen. Keiinirek qazaqstandyq qonaqtar Ál-Aqsa meshitine basqa jol arqyly kirgizilgen.
Sáken Maiǵazievtiń bul esteligi áleýmettik jeli qoldanýshylary arasynda túrli pikir týdyrdy. Biri onyń áńgimesin qoldasa, endi biri ánshiniń sózderine qatysty syn pikirlerin bildirgen.
