Qazaqstandyq azamat ajyrasqannan keiin biologiialyq ákesi emes balanyń aldyndaǵy zańdy mindettemelerden bosatýdy talap etti. Ol ákeligi týraly jazbany joiýǵa múmkindik bermeitin zań normalaryna daý aityp, Konstitýtsiialyq sotqa júgindi. Bul týraly sottyń resmi habarlamasynda aitylǵan, dep habarlaidy ult.kz.
Is materialdaryna sáikes, er adam balanyń dúniege kelgen kezinde óziniń biologiialyq ákesi emes ekenin bilgen. Soǵan qaramastan, qujat júzinde ákesi bolyp tirkelýge óz erkimen kelisim bergen.
Alaida áielimen ajyrasqannan keiin ol sotqa júginip, týý týraly aktiden óz esimin alyp tastaýdy talap etken. Birinshi jáne apelliatsiialyq satydaǵy sottar onyń talabyn qanaǵattandyrmady. Sebebi ákelikti taný týraly sheshim er adamnyń óz erkimen qabyldanǵan.
Ótinish iesi qoldanystaǵy zańdar onyń quqyqtaryn shekteidi dep esepteidi. Onyń pikirinshe, biologiialyq týystyǵy joq balany asyraý jáne tárbieleý mindetin jalǵastyrý ádiletsiz.
Qazir isti Konstitýtsiialyq sot baiandamashy-sýdia Aijan Jatqanbaevanyń qatysýymen qarap jatyr. Talqylaýǵa Bas prokýratýra, memlekettik organdar, advokattar men quqyq qorǵaý uiymdarynyń ókilderi de qatysýda.
Konstitýtsiialyq sottyń túpkilikti sheshimi resmi saitynda jáne respýblikalyq basylymdarda jariialanady.
