Astanada himiialyq zattar men esirtki quraldarynyń zańsyz ainalymyna qarsy is-qimyl máselelerine arnalǵan Qazaqstan men AQSh sarapshylarynyń ekijaqty keńesi ótti. Kezdesýde zamanaýi qaýip-qaterlerge qarsy birlesken áreketter, vedomstvoaralyq ózara is-qimyl jáne halyqaralyq aqparat almasý tetikteri talqylandy, dep habarlaidy ult.kz.
Is-sharaǵa Qazaqstannyń Bas prokýratýrasy, Ulttyq qaýipsizdik komiteti, Ishki ister, Densaýlyq saqtaý, Ádilet, Qarjy ministrlikteri, Qarjy monitoringi agenttigi, Ulttyq bank ókilderi, sondai-aq AQSh-tyń Astanadaǵy Elshiligi, AQSh Esirtkige qarsy kúres basqarmasy (DEA) men AQSh Keden jáne shekara qyzmetiniń mamandary qatysty.
Keńes barysynda esirtki men prekýrsorlardyń zańsyz ainalymyn anyqtaý jáne onyń jolyn kesýdiń jańa tásilderi, úlken derekterdi paidalaný, táýekelderdi taldaý jáne jedel aqparat almasý máseleleri qaraldy. Sonymen qatar AQSh Ulttyq targeting ortalyǵynyń tájiribesi tanystyrylyp, Chemex júiesi arqyly himiialyq zattardy baqylaý tetikteri talqylandy.
QR IIM Esirtki qylmysyna qarsy is-qimyl komiteti tóraǵasynyń mindetin atqarýshy Eldar Ábdikenovtiń aitýynsha, qazirgi tańda qylmystyq toptar tsifrlyq tehnologiialar, kriptovaliýtalar, internet-platformalar jáne halyqaralyq logistikalyq baǵyttardy belsendi paidalanyp keledi. Sondyqtan mundai qaýipterge qarsy kúreste halyqaralyq yntymaqtastyqtyń róli artyp otyr.
Onyń málimetinshe, 2026 jyldyń alǵashqy alty aiynda elimizde tórt myńǵa jýyq esirtkige qatysty quqyq buzýshylyq anyqtalǵan. Alty uiymdasqan qylmystyq toptyń qyzmeti toqtatylyp, onyń bireýi transulttyq sipatta bolǵan. Sondai-aq sintetikalyq esirtki óndiretin 15 jasyryn zerthana joiylyp, zańsyz ainalymnan shamamen 10 tonna esirtki tárkilendi. Onyń ishinde 578 keliden astamy sintetikalyq esirtki bolǵan.
Budan bólek, quqyq qorǵaý organdary jetkizý arnalary der kezinde anyqtalǵanynyń arqasynda zańsyz ainalymǵa 12 tonnadan astam prekýrsordyń túsýine jol bermegen.
Kezdesý qorytyndysynda taraptar esirtki qylmysyna qarsy kúres salasyndaǵy yntymaqtastyqty odan ári keńeitýge, birlesken jumys tetikterin jetildirýge jáne kásibi tájiribe almasýdy jalǵastyrýǵa ýaǵdalasty.
