Qazaqstannyń IT-qyzmet eksporty ótken jyly 1 milliard dollardan asty. Qazir otandyq tsifrlyq ónimderdi álemniń 100-den astam eli paidalanady. Bul týraly jýrnalist Toqtar Jaqash Facebook-tegi paraqshasynda jazdy, dep habarlaidy ult.kz.
Onyń aitýynsha, bul kórsetkish Qazaqstan ekonomikasynda IT salasynyń mańyzy artyp kele jatqanyn kórsetedi.
«Buryn “Qazaqstan ne eksporttaidy?” dese, “munai, metall, astyq” deitinbiz. Endi oǵan IT ónimderin de qosatyn ýaqyt keldi», – dep jazdy jýrnalist.
Toqtar Jaqashtyń jazýynsha, Memleket basshysy Qasym-Jomart Toqaev Astanada ótken AI & Digital Bridge forýmynda jasandy intellekt pen tehnologiialardy ekonomikanyń naqty máselelerin sheshýge baǵyttaý qajettigin aitqan.
Prezident sondai-aq Donald Tramptyń bastamasymen AQSh-tyń jetekshi tehnologiialyq kompaniialarynyń Sýperintellekt týraly kelisimge qol qoiǵanyn atap ótken. Qasym-Jomart Toqaev bul tásildi múddeli memleketter jan-jaqty talqylap, jahandyq deńgeide qabyldaýǵa bolatyn úlgi retinde qarastyrýǵa bolatynyn aitqan.
Jýrnalisttiń pikirinshe, jasandy intellekt tehnologiialaryn konferentsiialar men forýmdar aiasyndaǵy talqylaýmen shektemei, óndiris, aýyl sharýashylyǵy, meditsina, bilim jáne biznes salalaryna engizý mańyzdy.
Ol sondai-aq Prezident usynǵan AI Challenge sekildi bastamalar arqyly perspektivaly jobalardy anyqtap, olardy óndiristiń ózinde qoldaný qajettigin atap ótti.
«1 milliard dollar tabys – bolashaq qadamnyń “bissimillá” bastamasy. Bul endi Qazaqstannyń syrtqa satatyn eksporty – munai emes, metall emes, qazaqstandyq aqyl men tehnologiia bolýy ábden múmkin», – dep jazdy Toqtar Jaqash.
