قازاقستاننىڭ IT-قىزمەت ەكسپورتى ٶتكەن جىلى 1 ميلليارد دوللاردان استى. قازٸر وتاندىق تسيفرلىق ٶنٸمدەردٸ ەلەمنٸڭ 100-دەن استام ەلٸ پايدالانادى. بۇل تۋرالى جۋرناليست توقتار جاقاش Facebook-تەگٸ پاراقشاسىندا جازدى, دەپ حابارلايدى ult.kz.
ونىڭ ايتۋىنشا, بۇل كٶرسەتكٸش قازاقستان ەكونوميكاسىندا IT سالاسىنىڭ ماڭىزى ارتىپ كەلە جاتقانىن كٶرسەتەدٸ.
«بۇرىن “قازاقستان نە ەكسپورتتايدى?” دەسە, “مۇناي, مەتالل, استىق” دەيتٸنبٸز. ەندٸ وعان IT ٶنٸمدەرٸن دە قوساتىن ۋاقىت كەلدٸ», – دەپ جازدى جۋرناليست.
توقتار جاقاشتىڭ جازۋىنشا, مەملەكەت باسشىسى قاسىم-جومارت توقاەۆ استانادا ٶتكەن AI & Digital Bridge فورۋمىندا جاساندى ينتەللەكت پەن تەحنولوگييالاردى ەكونوميكانىڭ ناقتى مەسەلەلەرٸن شەشۋگە باعىتتاۋ قاجەتتٸگٸن ايتقان.
پرەزيدەنت سونداي-اق دونالد ترامپتىڭ باستاماسىمەن اقش-تىڭ جەتەكشٸ تەحنولوگييالىق كومپانييالارىنىڭ سۋپەرينتەللەكت تۋرالى كەلٸسٸمگە قول قويعانىن اتاپ ٶتكەن. قاسىم-جومارت توقاەۆ بۇل تەسٸلدٸ مٷددەلٸ مەملەكەتتەر جان-جاقتى تالقىلاپ, جاھاندىق دەڭگەيدە قابىلداۋعا بولاتىن ٷلگٸ رەتٸندە قاراستىرۋعا بولاتىنىن ايتقان.
جۋرناليستتٸڭ پٸكٸرٸنشە, جاساندى ينتەللەكت تەحنولوگييالارىن كونفەرەنتسييالار مەن فورۋمدار اياسىنداعى تالقىلاۋمەن شەكتەمەي, ٶندٸرٸس, اۋىل شارۋاشىلىعى, مەديتسينا, بٸلٸم جەنە بيزنەس سالالارىنا ەنگٸزۋ ماڭىزدى.
ول سونداي-اق پرەزيدەنت ۇسىنعان AI Challenge سەكٸلدٸ باستامالار ارقىلى پەرسپەكتيۆالى جوبالاردى انىقتاپ, ولاردى ٶندٸرٸستٸڭ ٶزٸندە قولدانۋ قاجەتتٸگٸن اتاپ ٶتتٸ.
«1 ميلليارد دوللار تابىس – بولاشاق قادامنىڭ “بٸسسٸمٸللە” باستاماسى. بۇل ەندٸ قازاقستاننىڭ سىرتقا ساتاتىن ەكسپورتى – مۇناي ەمەس, مەتالل ەمەس, قازاقستاندىق اقىل مەن تەحنولوگييا بولۋى ەبدەن مٷمكٸن», – دەپ جازدى توقتار جاقاش.
