Qazaqstan halyqaralyq investitsiialyq tartymdylyǵy boiynsha pozitsiiasyn nyǵaityp keledi. El 2026 jylǵy «Investorlar úshin eń qaýipsiz elder» jahandyq reitinginde 17 satyǵa joǵarylap, 53-orynǵa kóterildi. Osylaisha Qazaqstan Ortalyq Aziiadaǵy kóshbasshy mártebesin saqtap otyr, dep habarlaidy ult.kz investing.com-ǵa silteme jasap.
2026 jyldyń alǵashqy jartyjyldyǵynda elge tartylǵan investitsiia kólemi 9,6%-ǵa ósip, 20 milliard AQSh dollarynan asty. Jeke investitsiialar aǵyny 21%-dan astam ulǵaidy. Sarapshylar bul kórsetkishterdi Qazaqstan ekonomikasyna degen halyqaralyq senimniń artýymen bailanystyrady.
Sońǵy jyldary jahandyq investorlar tabiǵi resýrstardan góri memlekettik institýttardyń tiimdiligine, ekonomikalyq saiasattyń turaqtylyǵyna jáne uzaq merzimdi damý áleýetine kóbirek mán bere bastady. Osy turǵydan alǵanda Qazaqstan halyqaralyq kapital úshin senimdi baǵyt retinde baǵalanyp keledi.
Halyqaralyq valiýta qorynyń boljamynsha, Qazaqstan ekonomikasy 2026 jyly 4,6%-ǵa ósedi. Al Dúniejúzilik bank eldegi turaqty ekonomikalyq ósim aldaǵy jyldary da saqtalatynyn atap ótedi.
Ekonomikanyń qurylymy da ózgerip keledi. Sońǵy jyldary ósimniń negizgi draiverleri óńdeý ónerkásibi, kólik, logistika, qurylys jáne saýda salalary boldy. Jańa investitsiialar da dál osy baǵyttarǵa kóbirek tartylýda. Bul Qazaqstannyń shikizattyq ekonomikadan ártaraptandyrylǵan óndiristik modelge kezeń-kezeńimen kóship jatqanyn kórsetedi.
Prezident Qasym-Jomart Toqaevtyń tapsyrmasymen investitsiialyq saiasat jańa sapalyq deńgeige kóterildi. Basty basymdyq endi tek kapital tartý emes, joǵary tehnologiialy óndiristerdi damytý, óńdeý ónerkásibin kúsheitý, óndiristi jergiliktendirý jáne uzaq merzimdi investitsiialardy yntalandyrý bolyp otyr.
Osy saiasat aiasynda Investitsiialyq shtab, Ulttyq tsifrlyq investitsiialyq platforma jáne strategiialyq investorlarǵa arnalǵan 25 jylǵa deiingi turaqty sharttardy kózdeitin investitsiialyq kelisimder engizildi. Sonymen qatar investorlar men joǵary bilikti mamandar úshin «Altyn» vizasy iske qosylýda.
Qazaqstannyń investitsiialyq senimdiligi halyqaralyq reitingtik agenttikterdiń baǵalaýymen de rastaldy. Fitch Ratings eldiń egemen kredittik reitingin BBB deńgeiinde turaqty boljammen saqtady. S&P Global Ratings Qazaqstannyń BBB- reitingin oń boljammen rastady. Al Moody's agenttigi Baa1 reitingin oń boljammen ózgertpedi. Bul úsh jetekshi halyqaralyq agenttiktiń baǵalaýy Qazaqstan ekonomikasynyń turaqtylyǵy men investitsiialyq deńgeiin taǵy bir márte dáleldeidi.
Qazaqstannyń halyqaralyq reitingterdegi kórsetkishteri de jaqsaryp keledi. El IMD World Competitiveness Ranking reitingindegi pozitsiiasyn nyǵaitsa, Global Peace Index boiynsha bes satyǵa kóterildi. Sondai-aq BUU-nyń Turaqty damý jónindegi 2026 jylǵy baiandamasynda Qazaqstan 169 memlekettiń ishinde 67-orynǵa kóterilip, Túrkiia, Úndistan, Indoneziia, Meksika, Saýd Arabiiasy jáne Ońtústik Afrika siiaqty birqatar iri damýshy ekonomikalardy basyp ozdy.
Halyqaralyq sarapshylardyń baǵalaýynsha, mundai reitingter eldiń bedelin arttyryp qana qoimai, investitsiialyq táýekeldi tómendetýge, kapital tartý qunyn azaitýǵa jáne halyqaralyq biznestiń Qazaqstandy jańa jobalarǵa arnalǵan senimdi alań retinde qarastyrýyna yqpal etedi.
