Memleket basshysy Aqorda tórinde ómir joly óskeleń urpaqqa úlgi-ónege bolatyn, ult múddesi úshin qajyrly qyzmet etip, halyqtyń yqylasyna bólenip kele jatqan bir top azamatqa qurmet kórsetti, dep habarlaidy ult.kz.
Atap aitqanda, kórnekti sýretshi, tanymal óner qairatkeri Bátima Záýirbekovaǵa «Otan» ordeni, kórnekti ádebiettanýshy ǵalym Tursyn Jurtbaiǵa I dárejeli «Barys» ordeni, memleket qairatkeri Aleksandr Sýdinge II dárejeli «Barys» ordeni tabystaldy. Belgili akter, kórnekti teatr rejisseri Nurqanat Jaqypbaiǵa «Qazaqstannyń halyq ártisi» ataǵy, aýyl sharýashylyǵy salasynyń ardageri Viktor Hilnichenkoǵa «Qazaqstannyń eńbek sińirgen qairatkeri» qurmetti ataǵy berildi.
Qasym-Jomart Toqaev marapat ielerin quttyqtap, árqaisysynyń el úshin sińirgen eńbegine jeke-jeke toqtaldy.
Prezident ulttyq mádenietimizdi damytý jolynda kóp eńbek etip, beineleý ónerinde qaitalanbas qoltańbasymen erekshelengen Bátima Záýirbekova otandyq gobelen óneri mektebiniń negizin qalap, qazaq áielderi arasynan shyqqan osy saladaǵy tuńǵysh kásibi maman atanǵanyna nazar aýdardy.
– Shyǵarmashylyǵyńyz joǵary deńgeide moiyndalyp, Memlekettik syilyqtyń iegeri boldyńyz. Halqymyzdyń tarihyn, bitim-bolmysyn, oiý-órnegi men salt-dástúrin dáripteýge basa mán berdińiz. Sizdiń týyndylaryńyz Almaty jáne basqa da qalalardyń áigili ǵimarattaryna kórik berip tur. Týyndylaryńyz óz elimizben qatar shet memleketterde saqtalýda. Sizdiń eńbekterińizdi álemge belgili mamandar óte joǵary baǵalaidy. Ulttyq óner jolynda salǵan dara jolyńyz jas býyn azamattary úshin tamasha úlgi-ónege dep sanaimyn, – dedi Memleket basshysy.
Qasym-Jomart Toqaev sanaly ǵumyryn ult rýhaniiatyn damytýǵa arnap kele jatqan kórnekti ǵalym, qarymdy qalamger Tursyn Jurtbai tól tarihymyzdyń aqtańdaq tustaryn zerttep, halyqtyń sana-sezimin jańǵyrtýǵa eleýli úles qosqanyn atap ótti.
– Abai Qunanbaiulynyń ómiri men shyǵarmashylyǵyn tereń zerttep, jan-jaqty dáripteýge zor eńbek sińirdińiz. Abai – ulttyń rýhani temirqazyǵy, óskeleń urpaqtyń ainymas baǵdary. Shyn máninde, uly oishyldy taný – qazaqty taný degen sóz. Siz Muhtar Áýezovtiń jáne ult qairatkerleriniń mol murasy men ónegeli ómiri týraly qundy ǵylymi eńbekter jazdyńyz. Shoqtyǵy biik kórkem shyǵarmalaryńyz arqyly tól ádebietimizdiń qundylyǵyn arttyra tústińiz, – dedi Memleket basshysy.
Prezident memleketimizdiń damýyna Táýelsizdiktiń eleń-alańynan bastap belsene atsalysyp kele jatqan Aleksandr Sýdinge alǵys aitty.
– Memlekettik qyzmette jumys istegen jyldary zor qurmetke ie boldyńyz. Parlament Senatynyń depýtaty retinde halyq múddesin qorǵadyńyz. Vitse-spiker jáne Senat apparatynyń basshysy retinde qazaqstandyq parlamentarizmniń damýyna qosqan úlesińizdi airyqsha atap ótkim keledi. Sizdiń kásibi eńbegińiz joǵary baǵalanyp, Otanǵa adal qyzmet etýdiń úlgisine ainaldy, – dedi Memleket basshysy.
Prezident teatr jáne kino salasynda jarty ǵasyrdan astam ýaqyt jumys istep kele jatqan belgili rejisser Nurqanat Jaqypbaidyń tól mádenietimizdi órkendetý jolyndaǵy eńbegi zor ekenin jetkizdi.
– Kórermenniń kózaiymy bolǵan mazmundy qoiylymdardy sahnalap, teatr áleminiń naǵyz maitalmany retinde tanyldyńyz. Kóptegen pesalar men filmderde túrli rólderdi sheber somdap, halyqtyń ystyq yqylasyna bólendińiz. Búginde jas talanttardy ónerge baýlyp, olarǵa baǵyt-baǵdar berip kelesiz. Rýhaniiat salasyn damytýǵa sińirgen eńbegińiz úshin ózińizge shynaiy rizashylyǵymdy bildiremin, – dedi Qasym-Jomart Toqaev.
Qasym-Jomart Toqaev kásibi jolyn agronomdyqtan bastap «Hilnichenko jáne K» seriktestiginiń basshysyna deiin kóterilgen Viktor Hilnichenkonyń agroónerkásip salasyn damytýǵa qosqan úlesine toqtalyp, Almaty oblystyq máslihatynyń depýtaty retinde jemisti qoǵamdyq qyzmet atqarǵanyn da atap ótti.
– Eń bastysy, qol jetkizgen jetistikterińizge toqmeiilsimei, aldyńyzǵa jańa ári biik maqsattar qoiyp kelesiz. Aimaqtyń agroónerkásip áleýetin kóterýge qosqan zor úlesińiz qandai baǵaǵa bolsa da laiyq, – dedi Memleket basshysy.
