Advokat Meiirman Shekeev qoǵam qairatkeri, aqyn Muhtar Shahanovtyń 40 kúndik asyna qatysyp, onyń ult múddesi jolyndaǵy kúresi týraly esteligimen bólisti, dep habarlaidy ult.kz.
Shekeevtiń aitýynsha, kópshilik Muhtar Shahanovty aqyn, kompozitor jáne qoǵam belsendisi retinde tanyǵanymen, onyń basty maqsaty qazaq halqynyń múddesine qyzmet etý bolǵan.
Advokattyń sózinshe, Muhtar Shahanovtyń jary Hanshaiym apaidyń aitýy boiynsha, ol bir saparynda Máskeýde syrqattanyp, Kreml aýrýhanasyna jatý týraly usynys alǵan. Alaida belgisiz adam telefon arqyly eskertý jasap, ol aýrýhanaǵa jatsa, aman shyǵýy ekitalai ekenin aitqan. Osydan keiin Muhtar Shahanov Qazaqstanǵa shuǵyl oralyp, qaýipten qutylǵan kórinedi.
Meiirman Shekeev taǵy bir oqiǵany baiandap, Muhtar Shahanov Almatydaǵy №7 aýrýhanada jatqan kezinde túnde perde artynda pyshaq ustaǵan beineni kórgen kórinedi. Onyń pikirinshe, osy sekildi oqiǵalar keiin Muhtar Shahanovtyń Qyrǵyzstanǵa elshi bolyp qyzmet atqarýyna áser etken.
Shekeevtiń pikirinshe, Muhtar Shahanov qandai qysym kórse de, ulttyq múdde jolyndaǵy ustanymynan eshqashan ainymaǵan.
«Qazaq tiliniń memlekettik til retinde bekitilýi jolynda Muhtar aǵanyń eńbegi zor boldy. Ol óz kózqarasyn ashyq aityp, ult múddesin qorǵaýda batyldyq tanytty», – dedi advokat.
