Bul – Qanaǵat Mustafinniń ekinshi tolyqmetrajdy filmi. 2010 jyly rejisserdiń sport taqyrybyndaǵy «Ryvok» atty debiýti jaryqqa shyqqan bolatyn. Eki filmniń arasynda Mustafin «Qara shańyraq», «Ómir synaǵy», «Ainalaiyn» serialdaryn túsirdi.
Komediianyń biýdjeti 400 myń dollardan asady (2014 jyly dollardyń baǵamy 180 teńgeden sál joǵary bolatyn). Basty rólderde Berik Aitjanov, Asha Matai jáne Ánýar Nurpeiisovter oinaǵan. «Nelikten kórermenge burynnan jaqsy tanys ártisterdi tańdadyńyz?» degen suraqqa rejisser «ártistik sheberlikterin jaqsy bilgendikten, stsenariidi osy úsheýine arnap jazdym» dep jaýap qatty.
Film jelisinde jasy otyzdan asqan jalǵyz ulyn úilendirýdi armandaityn ata-ananyń hikaiasy baiandalady. Hikaiada qazaqtyń ejelden kele jatqan «bel quda» salty kórinis beredi. Bolat Ábdilmanov, Ǵani Quljanov, Qaragóz Tileýbekova, Jomart Zeinábil, Danagúl Temirsultanova, Azat Seitmetov, Raihan Halioldina syndy tisqaqqan teatr jáne kino ártisteri komediianyń boiaýynyń qanyq bolýyna úles qosqan.
Ashat Maemirov, «Qazaq áýenderi» AQ prezidenti:
– Qanaǵat «16 qyz» arqyly aýyl men qala bolmysynyń arasyndaǵy qaishylyqty joiýǵa tyrysypty. Sondai-aq, qazaqtyń «bel quda» degen dástúrin ádemi jetkize bilgen eken. Siýjetti aiaǵyna deiin nanymdy alyp shyqty. Rejisser ata-ananyń úmitin aqtaý bala úshin eń basty qundylyq ekenin kórsetti. Filmde negizgi salmaq Berik Aitjanovqa túsken. Berik komediialyq beineni jaqsy alyp shyqty dep esepteimin.
Shyǵarmanyń ón boiynda Sháken Aimanovty ulyqtaý protsesi júrip otyrdy. Sol sát maǵan Qanaǵat sekildi jas býyn uly rejisserdiń aldynda taǵzym etkendei áser etti. Filmnen Sháken aǵanyń estetikasy sezilip turdy. Qanaǵat osy týyndysy arqyly «qazirgi jas rejisserler qazaqtyń ulttyq iýmoryn, ulttyq minezin túsinbeidi» degen pikirdi joqqa shyǵardy. Munda Aimanovtyń "Taqiialy perishte», «Bizdiń súiikti dáriger» filmderimen úndestik bar.
Al, kemshilikterge keler bolsaq, aýdarmada bizdiń sózdik oralymǵa kelmeitin 6-7 sózdi baiqap qaldym. Bul qatelikti jóndeýge bolady dep oilaimyn.
.jpg)
