Atyraý oblysynda jubaiynyń týystaryn óltirgeni úshin ómir boiyna bas bostandyǵynan aiyrylǵan Sultan Sársemálievtiń bes kámeletke tolmaǵan balasynyń qazirgi jaǵdaiy belgili boldy, dep habarlaidy ult.kz, Tengrinews.kz-ke silteme jasap.
Málimetke sáikes, balalar qazir memleket qamqorlyǵynda. Olardyń tórteýi Atyraý oblystyq kámeletke tolmaǵandardy beiimdeý ortalyǵynda tárbielenip jatyr. Al eń kenje sábi mamandandyrylǵan sábiler úiine ornalastyrylǵan.
Ortalyq ókilderiniń aitýynsha, balalardyń densaýlyq jaǵdaiy jaqsy. Olarmen turaqty túrde dárigerler men psihologtar jumys júrgizýde. Ákesi men ájesi balalarǵa aptasyna bir ret baryp turady. Anasynyń týystary da birneshe márte barǵan.
Qazirgi ýaqytta balalardy qamqorlyǵyna alýǵa týystarynan resmi ótinish túspegen. Al olardyń anasy Aqbaian Muqanǵalievaǵa qatysty ata-ana quqyǵynan aiyrý máselesi áli qaralyp jatyr. Eger emdelip, áreketke qabiletti dep tanylsa, zań aiasynda balalaryn óz qamqorlyǵyna qaitarýǵa quqyly bolady.
Eske salaiyq, buǵan deiin Atyraý oblysynyń qylmystyq ister jónindegi mamandandyrylǵan aýdanaralyq soty Sultan Sársemálievti birneshe adamdy óltirý, alaiaqtyq, urlyq, qujattardy qoldan jasaý jáne avtokólikti zańsyz iemdený baptary boiynsha kináli dep tanyp, ómir boiyna bas bostandyǵynan aiyrǵan bolatyn. Sonymen qatar sot ony jábirlenýshilerge 40 million teńge kóleminde moraldyq ótemaqy tóleýge mindettedi.
