Foto: lada.kz
Mańǵystaý oblysynda aýa raiynyń kúrt buzylýy aýyr saldarǵa ákeldi. Nóser jaýynnan keiin júzden astam jylqy qyrylyp, turǵyndar dabyl qaǵýda, habarlaidy Ult.kz Lada.kz basylymyna silteme jasap.
Mańǵystaý oblysynda tolassyz jaýǵan jańbyr saldarynan jylqylar jappai qyryldy. Tabiǵi apattyń saldary ásirese Aqshymyraý aýyly mańynda aiqyn baiqalǵan.
Jergilikti turǵyndardyń aitýynsha, nóserden keiin maldy sý aǵyzyp áketip, sortańdy, batpaqty aimaqtarǵa túsirgen. Sonyń saldarynan kóptegen jylqy tuzdy batpaqqa batyp ólgen, al keibiri áli kúnge deiin shyǵa almai jatyr.
Áleýmettik jelilerde taraǵan málimetterge sáikes, ár shańyraq birneshe bastan on basqa deiin malynan aiyrylǵan. Turǵyndar tótenshe jaǵdailar qyzmeti men jergilikti biliktiń shuǵyl áreket etpese, jaǵdai odan ári ýshyǵýy múmkin ekenin aitady.
Osyǵan bailanysty olar máseleni zań shyǵarýshylar men janýarlardy qorǵaý uiymdarynyń nazaryn aýdarýdy surap otyr.
Mańǵystaý aýdany ákimdiginiń habarlaýynsha, jaǵdaidy baǵalaý úshin arnaiy komissiia qurylǵan. Aldyn ala derek boiynsha, 100-den astam jylqy qyrylǵany anyqtalǵan. Degenmen naqty shyǵyn kólemi áli naqtylanyp jatyr, sebebi mal ieleri túlikti tolyq eseptep úlgermegen.
Mamandardyń boljamynsha, apatqa ekpindi jel men nóser jaýyn sebep bolǵan. Baǵdarynan jańylǵan jylqylar alys, jetýi qiyn aýmaqtarǵa kirip ketip, batpaqta qalyp qoiǵan. Keibir úiirler eldi mekenderden 60–80 shaqyrym qashyqtyqta tabylǵan.
Qazirgi ýaqytta saldardy joiý jumystary júrip jatyr. Aimaqqa tótenshe jaǵdailar qyzmeti, jergilikti atqarýshy organdar jáne iri kásiporyndardyń tehnikasy jumyldyrylǵan. Sýdy sorý jáne qalpyna keltirý sharalary kúsheitilgen rejimde júrgizilýde.
