NASA Aida turaqty adam qatysýyn qamtamasyz etýge baǵyttalǵan jańa Moon Base baǵdarlamasyn tanystyrdy. Joba aiasynda Aiǵa roverler, qoný apparattary men drondar jiberiledi, dep habarlaidy ult.kz skyandtelescope.org-ke silteme jasap.
Ǵarysh agenttigi alǵashqy kezeńge AQSh-tyń jetekshi aeroǵarysh kompaniialarymen 700 million dollardan astam kelisimshart jasaǵan. Tolyq joba quny shamamen 20 milliard dollarǵa baǵalanyp otyr.
NASA josparyna sáikes, 2026-2029 jyldary Ai betinde alǵashqy zertteýler júrgizilip, tehnologiialar synalady. 2029-2032 jyldary bazanyń bastapqy infraqurylymy iske qosylady, al 2032 jyldan keiin Aida jartylai turaqty adam qatysýyn qalyptastyrý kózdelgen.
2026 jyly júzege asyrylatyn alǵashqy úsh missiia Ai betiniń erekshelikterin zertteýge baǵyttalady. Sonymen qatar ǵalymdar Aidyń paida bolýy, evoliýtsiiasy jáne qurylymy týraly mańyzdy derekter jinamaq.
NASA sondai-aq Astrolab jáne Lunar Outpost kompaniialaryna 2028 jylǵa deiin bir tonnaǵa deiingi ai roverlerin ázirleýge shamamen 220 million dollardan bóldi. Al Blue Origin kompaniiasy Aiǵa jetkiziletin apparattardy jasaýǵa 280 million dollarǵa deiin qarjy alady.
Degenmen sarapshylar jobanyń merzimi tym qysqa ekenin atap ótýde. Buǵan qosa, Blue Origin kompaniiasynyń New Glenn zymyrany jaqynda synaq kezinde jarylyp, baǵdarlamanyń ýaqytynda oryndalýyna qatysty suraqtar týyndady.
NASA bolashaqta Aidyń ońtústik poliýsine erekshe nazar aýdarmaq. Ǵalymdardyń pikirinshe, bul aimaqta muz túrindegi sý qory bolýy múmkin, al ol bolashaqtaǵy ǵaryshtyq missiialar úshin mańyzdy resýrs sanalady.
