Dýbai – Tel-Aviv baǵytyndaǵy FlyDubai ushaǵynda bolǵan oqiǵaǵa qatysqan jolaýshy RBK basylymyna bortta bolǵan jaǵdaidyń mán-jaiyn aityp berdi, dep habarlaidy ult.kz.
Jolaýshy Shota Mýsaevtyń aitýynsha, ushaq shamamen jarty minýt ishinde 4-6 shaqyrym biiktikten tómendegen. Sol sátte ekinshi pilot komandirge shabýyl jasaǵan.
«Biz onyń nemen shabýyldaǵanyn kórmedik. Jigitterdiń biri kabinaǵa kirip, shabýyl jasaǵan adamdy alyp shyqty. Sodan keiin ony bailap tastady», – dedi Mýsaev.
Onyń sózinshe, jaralanǵan ushqyshqa aldymen borttaǵy medbike kómek kórsetken. Keiin Mýsaev ta oǵan qosylǵan. Pilottyń qoly, moiny men jelkesinde tereń jaraqattar bolǵan. Sonymen qatar arteriialyq jáne venalyq qan ketý baiqalǵan.
«Negizinde, onyń qoly tolyq jyrtylǵan, bilezik tusyna deiin qatty jaraqattanǵan», – dedi jolaýshy.
Mýsaev ushaqtyń Saýd Arabiiasyna shuǵyl qonýyna pilottyń jaǵdaiy sebep bolǵanyn aitty. Onyń sózinshe, Izrail men Saýd Arabiiasy arasynda diplomatiialyq qatynas bolmasa da, ushqyshtyń ómirin saqtaý úshin sol elge qonýǵa týra kelgen.
«Biz Izrailge deiin jete almas edik. Basqa tańdaý bolmady», – dedi ol.
Jolaýshynyń aitýynsha, ushaqty qaýipti tómendeýden alyp shyqqan da jolaýshylardyń biri bolǵan. Ol kabinaǵa kirip, ushaqty joǵary kóterý úshin basqarý tetigin tartqan.
Sondai-aq bortta kezdeisoq taǵy eki ushqysh bolǵany belgili boldy. Olar ushaq ekipajynyń músheleri emes, qarapaiym jolaýshylar retinde sapar shekken. Solardyń biri jaralanǵan komandirdiń ornyna ushaqty basqarǵan.
Mýsaevtyń aitýynsha, kabina esiginiń ashyq bolýy, bortta qosymsha eki ushqyshtyń kezdeisoq bolýy jáne jolaýshylardyń der kezinde áreket etýi jaǵdaidy ýshyqtyrmai, ushaqty aman alyp qalýǵa múmkindik bergen.
«Qudai bizben birge boldy», – dedi ol.
Jolaýshy bolǵan jaǵdaidy jeke adamdardyń erligi dep baǵalamaitynyn atap ótti. Onyń sózinshe, sol sátte búkil ushaqtaǵy adamdar bir komandaǵa ainalǵan.
Aita keteiik, FlyDubai áýe kompaniiasynyń Dýbaidan Tel-Avivke baǵyt alǵan ushaǵynda ushqyshtar arasynda janjal bolyp, áýe kemesi kúrt tómendegen.
