Dýbaidan Tel-Avivke baǵyt alǵan Flydubai áýe kompaniiasynyń FZ1073 reisinde tótenshe jaǵdai bolyp, ushaq baǵytyn ózgertip, Saýd Arabiiasynyń Tabýk qalasyna shuǵyl qondy. Bortta 174 adam bolǵan, dep habarlaidy ult.kz.
Aldyn ala málimet boiynsha, ushý kezinde ushqyshtar arasynda janjal shyqqan. Bir ushqysh ekinshisine pyshaqpen shabýyl jasaǵan. Saldarynan kapitan jaraqat alǵan.
Oqiǵa kezinde ushaq birneshe minýt ishinde shamamen 14 myń fýtqa tómendegen. Borttan aldymen jalpy tótenshe jaǵdaidy bildiretin 7700, keiin áýe kemesine zańsyz aralasý nemese basyp alý qaýpin bildiretin 7500 signaly berilgen.
Jolaýshylar men borttaǵy ekipaj músheleri kabinaǵa kirip, shabýyl jasaǵan ushqyshty zalalsyzdandyrǵan. Sondai-aq bortta bolǵan qosalqy ushqyshtar áýe kemesin basqarýdy qolǵa alyp, ony Tabýk áýejaiyna qaýipsiz qondyrǵan.
Ushaq kapitany men ekinshi ushqysh aýrýhanaǵa jetkizilgen. Shabýyl jasaǵan ushqysh Saýd Arabiiasynda ustalǵany habarlandy. Onyń áreketiniń naqty sebebi ázirge belgisiz.
Flydubai kompaniiasy reistegi «kabinadaǵy janjal» faktisin rastady. Kompaniia tergeý aiaqtalǵansha Izrailge jáne Izrailden oryndalatyn reisterdi ýaqytsha toqtatatynyn málimdedi.
Oqiǵaǵa qatysty tergeý jalǵasyp jatyr. Keibir izraildik sheneýnikter bul áreketti áýe kemesin qasaqana qulatýǵa jasalǵan áreket retinde baǵalaǵanymen, oqiǵanyń naqty sebebi men shabýyl jasaǵan adamnyń ýáji resmi túrde áli anyqtalǵan joq.
