Senator, Halyqaralyq qatynastar, qorǵanys jáne qaýipsizdik komitetiniń tóraǵasy Muhtar Qul-Muhammed Resei Federatsiiasy Dýmasynyń depýtaty Viacheslav Nikonovtyń arandatýshylyq sózine qarsy osyndai pikir bildirdi, dep habarlaidy QR Parlamenti Senatynyń baspasóz qyzmeti.
Óz pikirinde senator qazaq halqynyń tarihy tym tereńde jatqanyn, onyń ishinde ata-babalarymyzdyń ejelden Soltústik Qazaqstandy qonys etkenin aitqan.
«Erte zamandardan beri qarai atalǵan jerlerdi qazaq taipalary jailaǵany – basy ashyq aqiqat. Dál osy jerde bizdiń zamanymyzǵa deiin úshinshi myńjyldyqta ómir súrgen ataqty Botai mádenietiniń qonystary tabyldy. Botailyqtar jabaiy jylqylardy qolǵa úiretken, jylqy sharýashylyǵymen jáne ártúrli kásippen ainalysqan. Ǵasyrlar men myńjyldyqtar boiy osy dalada bizdiń tikelei babalarymyz – saqtar, ǵundar, túrkiler, qypshaqtar men qazaqtar qurǵan memleketter birin-biri almastyryp otyrdy», – deidi Muhtar Qul-Muhammed.
Sonymen qatar, Senat depýtaty qazaq dalasynda Túrki qaǵanaty, Deshti-Qypshaq, orta ǵasyrdaǵy dańqty memleket – Altyn Orda, Qazaq handyǵy týyn tikkenin jáne búgingi Qazaqstan osy elderdiń zańdy jalǵasy ekenin dáleldi jetkizgen.
«Altyn Ordanyń negizin qalaǵan Joshy han – Kerei men Jánibekten Abylaiǵa deiingi barlyq qazaq handarynyń atasy. Joshy hannyń mazary Ulytaýda, Ortalyq Qazaqstannyń aýmaǵynda ornalasqan. Altyn Orda ydyraǵannan keiin 1465 jyly Qazaq handyǵy quryldy. Onyń 550-jyldyǵyn 2015 jyly Qazaqstan memlekettik deńgeide atap ótti. Mine, dál osy handyq Reseimen dostyq qarym-qatynas ornatqan. Bul týraly reseilik ǵalymdar jan-jaqty zertteýler jasaǵan», – dedi Muhtar Qul-Muhammed.
Senator búginde Qazaqstan men Reseidiń arasynda úlgili bailanys ornaǵanyn da atap ótken.
«Qazirgi tańda Qazaqstan men Reseidi strategiialyq seriktestik, máńgilik dostyq týraly kelisim jáne odaqtastyq, jeti jarym myń shaqyrymnan astam shekara, eń bastysy – azamattarymyz ben halyqtarymyzdy kózge kórinbes berik jarasym bailanystyryp tur», – dedi senator.
Sondyqtan, Táýelsizdik kúniniń qarsańynda aitylǵan Viacheslav Nikonovtyń sózi halqymyzdyń ashý-yzasyn týdyrǵanyn aitty.
«Bul – saiasi jaýapsyzdyq qana emes, berik dostyq qarym-qatynas ornata bilgen milliondaǵan qazaq pen orystyń tarihi tanymyn qorlaý. Men úshin de jáne milliondaǵan qazaqstandyq úshin de orys pen qazaq halqy arasyndaǵy dostyqty saqtaýdyń mańyzdy ekeni aiqyn. Ásirese, aiyptaýlar men arandatýshylyq málimdemelerge jol berýge bolmaidy», – dedi Muhtar Qul-Muhammed.
Eske sala ketsek, Qazaqstan Respýblikasynyń Syrtqy ister ministrligine Resei Federatsiiasynyń Ýaqytsha senimdi ókili Aleksandr Komarov shaqyryldy.
QR SIM resei tarapynyń mundai málimdemelerge tiisti baǵa berýin kútýde jáne Resei Federatsiiasynyń memleket qairatkerlerinen mundai málimdemelerge jol bermeý úshin sharalar qabyldaýǵa shaqyrady.
