Mánerlep syrǵanaýdan Olimpiada chempiony Mihail Shaidorov 2026 jylǵy Milan qysqy Olimpiadasyndaǵy jeńisinen keiin jalaqy almai júrgenin aitty, dep habarlaidy ult.kz.
Qazaqstandyq sportshy Timýr Balymbetovke bergen suhbatynda jańa maýsymǵa daiyndyq bastalýy kerek ekenin, alaida ony qalai jalǵastyraryn túsinbei otyrǵanyn jetkizdi.
Shaidorovtyń sózinshe, bul jaǵdai onyń Týrizm jáne sport ministrligin synaǵanynan keiin bastalǵan bolýy múmkin. Sportshy Olimpiadadan keiin ministrlik onyń jalaqysy týraly aqparatty jariialaǵanyna narazy bolǵan.
«Osyǵan qatysty pikir bildirgennen keiin meni jazalaǵysy kelgendei áser qaldy. Olimpiadadaǵy jeńisten beri jalaqy almaimyn. Al qazir kelesi maýsymǵa daiyndalýym kerek, biraq qalai daiyndalarymdy bilmeimin. Jattyǵý jiyndary josparlanǵan, jańa baǵdarlama qoiý ýaqyty belgilengen. Biraq qarjylandyrý máselesinde naqty jaýap joq. Bir adam bir nárse aitady, ekinshisi basqa pikirde. Budan bólek, 1 aqpannan bastap dárigerimdi de alyp tastady», – dedi sportshy.
Olimpiada chempiony óziniń jalaqysy jariialanǵannan keiin oǵan eshkim naqty túsinikteme bermegenin aitty.
«Nelikten tek meniń bir jyldyq tabysym jariialandy? Basqa sportshylar týraly nege aitylmady? Men tek damyp, el namysyn qorǵaǵym keledi. Maǵan janjaldyń qajeti joq. Jalaqymnyń jariialanǵany unamaǵanyn aittym. Birinshiden, bul zańǵa qaishy dep esepteimin. Ekinshiden, shyndyqty aitqanym úshin jazalaǵysy keletindei kórinedi. Sonyń saldarynan maǵan eńbek sińirgen sport sheberi ataǵy berilmei, komandama da jalaqy tólenbei otyr», – dedi Shaidorov.
Aita keteiik, Mihail Shaidorov 2026 jylǵy Milan Olimpiadasynda altyn medal jeńip alyp, Qazaqstan tarihyndaǵy mánerlep syrǵanaýdan tuńǵysh Olimpiada chempiony atanǵan edi. Osydan keiin Memleket basshysy Qasym-Jomart Toqaev sportshyny arnaiy marapattaǵan bolatyn.
Al Týrizm jáne sport ministrligine qarasty Sportty damytý direktsiiasy Tengrinews.kz saýalyna jaýap berip, Mihail Shaidorovqa 2026 jyldyń qańtar jáne aqpan ailaryndaǵy jalaqy tolyq tólengenin málimdedi.
Vedomstvonyń túsindirýinshe, naýryz aiynan bastap Olimpiada chempiony úshin jańa kelisimshart ázirlenip jatyr. Onda kelesi olimpiadalyq tsikl aiasyndaǵy daiyndyq pen qarjylandyrý sharttary qarastyrylǵan.
Ministrlik sondai-aq memleket sportshy aldyndaǵy barlyq mindettemeni oryndaǵanyn atap ótti. Atap aitqanda, Olimpiada altyny úshin Mihail Shaidorovqa 250 myń dollar syiaqy, Almatydan úsh bólmeli páter jáne ómir boiy ai saiynǵy memlekettik tólemder qarastyrylǵan.
