Azamattarǵa arnalǵan úkimet memlekettik qyzmetterdi Blockchain tehnologiiasynyń kómegimen kórsete bastady, dep habarlaidy "Ult aqparat".
«Azamattarǵa arnalǵan úkimet» memlekettik korporatsiiasy Blockchain tehnologiiasyn memlekettik qyzmetterdi kórsetý úrdisine alǵashqy bolyp engizdi.
Ázirshe bul tehnologiia jyljymaityn múlik kepil shartyn tirkeý boiynsha jeke tulǵalarǵa kórsetiletin memlekettik qyzmetke qatysty qoldanyla bastady.
Aldaǵy ýaqytta bul tájiribe basqa da keń taralǵan qyzmetterge engizilýi yqtimal.
Bloktardyń tehnikalyq rettelgen tizbegi túrindegi Blockchain júiesi jeke málimetterdi úshinshi tulǵalarǵa berý múmkindiginen saqtap, aqparattyq qaýipsizdik pen sapaly qyzmetti qamtamasyz etedi.
«Azamattarǵa arnalǵan úkimet» memlekettik korporatsiiasynyń basqarma tóraiymy Ásemgúl Baltashevanyń aitýynsha, Blockchain tehnologiiasy kepil shartyn tirkeý úrdisin barynsha ońtailandyrýǵa jol ashty.
«Buǵan deiin qyzmet alýshylar múlik kepil shartyn tirkeý úshin birneshe mekemeni aralaýǵa májbúr bolatyn. Máselen, jyljymaityn múlikke quqyqtardy tirkeý týraly anyqtamany alý úshin HQO-ǵa nemese egov.kz portalyna júginip, sosyn ony bankke aparatyn. Endi bank qyzmetkeri ótinim jasaǵanda qyzmet alýshynyń jyljymaityn múlikke quqyqtary jáne aýyrtpalyqtardyń bar-joǵy týraly málimetter avtomatty túrde tekseriledi. Endi adamdar emes, málimetter siz úshin «júgiretin» boldy», – deidi Baltasheva.
Blockchain tehnologiiasyn qoldaný arqyly atalǵan qyzmetti kórsetý merzimi úsh kúnnen bir kúnge deiin qysqaryp, bankke usynylatyn qujattar tizimi de azaidy.
Endi qyzmet alýshy banktiń aqparattyq júiesinde múlik shartymen tanysyp, óziniń ETsQ-sy arqyly qol qoiady, al qyzmettiń nátijesi – jyljymaityn múlikke quqyqtardy memlekettik tirkeý týraly habarlama qyzmet alýshynyń egov.kz elektrondyq portalyndaǵy jeke kabinetine joldanady.
Blockchain tehnologiiasyn tańdaý barysynda jeli qoldanýshylarynyń áreketteriniń aiqyndyǵy, detsentralizatsiia jáne senimdi qorǵanys júiesi esepke alyndy.
Qazaqstanda kepil shartyn tirkeý boiynsha memlekettik qyzmetti osyndai ádispen kórsetý úrdisi kommertsiialyq banktiń birimen júzege asýda.
«Azamattarǵa arnalǵan úkimet» basqa da ekinshi deńgeili banktermen osy baǵytta qyzmet kórsetý týraly kelissózder júrgizip jatyr.
Sebebi Blockchain tehnologiiasy ekijaqty kelisim jasasý kezinde úshinshi tulǵalardy kiristirmei, qaýipsizdikti qamtamasyz etip, jyljymaityn múlik kepilimen beriletin nesieni onlain resimdeý jáne nesie berý merzimin qysqartýǵa múmkindik beredi.
