Prezident Qasym-Jomart Toqaev qazaqstandyqtardy el bolashaǵyna jaýapkershilikpen qarap, ulttyq múddeni bárinen biik qoiýǵa shaqyrdy. Sondai-aq Memleket basshysy tarihi murany saqtaý men Joshy ulysynyń tarihyn zertteý baǵytynda atqarylyp jatqan jumystarǵa toqtaldy, dep habarlaidy ult.kz.
«Biz órkenietti ári ozyq oily ult retinde ózimizge senimdi bolýymyz kerek. Eshkimge jaltaqtamai batyl áreket etýimiz qajet. Budan basqa jol joq.
Maqsaty aiqyn, kózi ashyq, kókiregi oiaý azamattarymyz memleket taǵdyryna jaýapty ekenin tereń túsinedi. Olar eriktiler qataryna qosylyp, qaiyrymdylyq jasap, mańyzdy bastamalardy tabysty iske asyryp júr.
Naǵyz otanshyl adam kózboiaýshylyqqa barmaidy, shyn patriot el múddesi úshin tabandy eńbek etedi. Jasampaz otanshyldyq degenimiz de – osy.
Memleket úshin bir kúnniń qamy emes, bolashaqtyń jaiy mańyzdy. Sondyqtan biz Abaidyń ulaǵatyna sai «aqyryn júrip, anyq basamyz». Ult múddesin bárinen biik qoiyp, alysqa kóz tigemiz.
Tól tarihymyzǵa qurmetpen qarap, urpaqtar sabaqtastyǵyn saqtaýǵa basa nazar aýdaramyz.
Bul baǵytta belsendi jumys istelýde.
Joshy han jerlengen Ulytaý aimaǵyna oblys mártebesi berildi. Elimizde Joshy ulysyn zertteý institýty quryldy. Biz bul mekemeniń ǵylymi áleýetin kúsheite beremiz.
Kóp uzamai Qazaqstan tarihynyń jeti tomdyq akademiialyq eńbegi jaryqqa shyǵady. Onyń bir tomy túgeldei Altyn Orda taqyrybyna arnaldy», - dedi Prezident.
