پرەزيدەنت قاسىم-جومارت توقاەۆ قازاقستاندىقتاردى ەل بولاشاعىنا جاۋاپكەرشٸلٸكپەن قاراپ, ۇلتتىق مٷددەنٸ بەرٸنەن بيٸك قويۋعا شاقىردى. سونداي-اق مەملەكەت باسشىسى تاريحي مۇرانى ساقتاۋ مەن جوشى ۇلىسىنىڭ تاريحىن زەرتتەۋ باعىتىندا اتقارىلىپ جاتقان جۇمىستارعا توقتالدى, دەپ حابارلايدى ult.kz.
«بٸز ٶركەنيەتتٸ ەرٸ وزىق ويلى ۇلت رەتٸندە ٶزٸمٸزگە سەنٸمدٸ بولۋىمىز كەرەك. ەشكٸمگە جالتاقتاماي باتىل ەرەكەت ەتۋٸمٸز قاجەت. بۇدان باسقا جول جوق.
ماقساتى ايقىن, كٶزٸ اشىق, كٶكٸرەگٸ وياۋ ازاماتتارىمىز مەملەكەت تاعدىرىنا جاۋاپتى ەكەنٸن تەرەڭ تٷسٸنەدٸ. ولار ەرٸكتٸلەر قاتارىنا قوسىلىپ, قايىرىمدىلىق جاساپ, ماڭىزدى باستامالاردى تابىستى ٸسكە اسىرىپ جٷر.
ناعىز وتانشىل ادام كٶزبوياۋشىلىققا بارمايدى, شىن پاتريوت ەل مٷددەسٸ ٷشٸن تاباندى ەڭبەك ەتەدٸ. جاسامپاز وتانشىلدىق دەگەنٸمٸز دە – وسى.
مەملەكەت ٷشٸن بٸر كٷننٸڭ قامى ەمەس, بولاشاقتىڭ جايى ماڭىزدى. سوندىقتان بٸز ابايدىڭ ۇلاعاتىنا ساي «اقىرىن جٷرٸپ, انىق باسامىز». ۇلت مٷددەسٸن بەرٸنەن بيٸك قويىپ, الىسقا كٶز تٸگەمٸز.
تٶل تاريحىمىزعا قۇرمەتپەن قاراپ, ۇرپاقتار ساباقتاستىعىن ساقتاۋعا باسا نازار اۋدارامىز.
بۇل باعىتتا بەلسەندٸ جۇمىس ٸستەلۋدە.
جوشى حان جەرلەنگەن ۇلىتاۋ ايماعىنا وبلىس مەرتەبەسٸ بەرٸلدٸ. ەلٸمٸزدە جوشى ۇلىسىن زەرتتەۋ ينستيتۋتى قۇرىلدى. بٸز بۇل مەكەمەنٸڭ عىلىمي ەلەۋەتٸن كٷشەيتە بەرەمٸز.
كٶپ ۇزاماي قازاقستان تاريحىنىڭ جەتٸ تومدىق اكادەمييالىق ەڭبەگٸ جارىققا شىعادى. ونىڭ بٸر تومى تٷگەلدەي التىن وردا تاقىرىبىنا ارنالدى», - دەدٸ پرەزيدەنت.
