Qazaqstanda jańa oqý jylyna mektepterdiń daiyndyǵyn tekserý barysynda myńdaǵan kemshilik anyqtaldy. Sanitariialyq talaptardyń saqtalýyna júrgizilgen monitoring nátijesinde olardy joiý jóninde 8,4 myń nusqama berilgen, dep habarlaidy ult.kz.
Bul týraly Úkimet otyrysynda Densaýlyq saqtaý ministri Aqmaral Álnazarova málimdedi.
Ministrdiń aitýynsha, maýsym aiynda júrgizilgen monitoringke mektepterdiń 99 paiyzy, iaǵni 7 121 nysan qamtylǵan. Sonymen qatar mektepterdegi meditsinalyq pýnktterdiń 96 paiyzy nemese 6 256 nysan, sondai-aq mektep-internattardyń 99,2 paiyzy, iaǵni 262 mekeme tekserilgen.
Tekserý nátijesinde jedel den qoiýdyń 287 sharasy qabyldandy. Onyń ishinde 247 nysannyń qyzmetine tyiym salyndy. Bul nysandardyń 240-ynda sanitariialyq-epidemiologiialyq qorytyndy bolmaǵan. Al taǵy 7 mektep apatty jaǵdaidaǵy ǵimarattarda ornalasqany anyqtaldy.
Budan bólek, 40 nysannyń qyzmetin ýaqytsha toqtatý týraly sheshim qabyldanǵan. Buǵan ǵimarattardyń sanitariialyq-tehnikalyq jaǵdaiynyń talapqa sáikes kelmeýi, injenerlik kommýnikatsiialardyń aqaýy jáne nysandardy qaýipsiz paidalanýǵa qajetti jaǵdailardyń jasalmaýy sebep bolǵan.
2026 jylǵy 13 tamyzdaǵy jaǵdai boiynsha berilgen nusqamalardyń 82,8 paiyzy, iaǵni 6 961 nysan boiynsha talaptar oryndalǵan.
Mektep ashanalary da nazardan tys qalǵan joq. Monitoring barysynda tamaqtaný nysandarynyń 95 paiyzy nemese 6 338 ashana qamtyldy.
Densaýlyq saqtaý ministri jańa oqý jylynda mektep ashanalarynda balalardyń tamaqtaný qaýipsizdigine qoiylatyn talaptar qatań saqtalýy tiis ekenin atap ótti.
Aita keteiik, 2026 jylǵy 1 aqpannan bastap memlekettik biýdjet esebinen qarjylandyrylatyn balalar nysandarynda memlekettik baqylaýdyń erekshe tártibi engizilgen. Bul talaptardyń oryndalýyn nysanǵa baryp baqylaýǵa jáne qajet bolǵan jaǵdaida jospardan tys tekserý júrgizýge múmkindik beredi.
