QR DSM respýblikalyq densaýlyq saqtaýdy damytý ortalyǵynyń bas direktory Qanat Tósekbaev meditsina túlekterin jumysqa ornalastyrý kórsetkishterin baiandady, dep habarlaidy QazAqparat.
«Meditsinalyq JOO, ǴZI, ǴO boiynsha 2020 jyly 7 910 maman darialandy. Aýyldyq kvotany qosa alǵanda, 5 551 túlek memlekettik grant boiynsha oqýdy aiaqtady. Sonymen birge QR «Bilim týraly» zańyna sáikes, 3 156 adam mindetti jumyspen óteýden bosatyldy. Onyń ishinde 1 735 maman rezidentýrada, magistratýrada, doktorantýrada oqýyn jalǵastyrdy, 1 421 maman júktilik, 3 jasqa deiingi bala kútimi, múgedektik boiynsha bosatyldy. Áskeri qyzmet úshin 3 túlektiń oqýy keiinge qaldyryldy. Al 272 jas maman jumysqa jiberilgen ornyna kelgen joq. Memlekettik meditsinalyq uiymdardaǵy eńbekpen óteý mindettemeleriniń oryndalýyn Bilim jáne ǵylym ministrliginiń «Qarjy ortalyǵy» AQ júzege qadaǵalaidy», - dedi Q. Tósekbaev Ortalyq kommýnikatsiialar ortalyǵynda ótken onlain brifingte.
Osylaisha 2020 jyly oqý bitirgen 2 054 maman jumysqa ornalasqan.
«Túlekterdi jumysqa ornalastyrý boiynsha eń joǵary kórsetkish Aqtóbe oblysynda tirkeldi, aimaqqa bólingen jas mamandardyń 90% kelgen. Jumyspen óteýden bosatylǵan túlekterdi eskere otyryp, Aqtóbe oblysyna 111 adam jiberilse, 100 jas maman jumysqa ornalasqan. Sondai-aq, Shyǵys Qazaqstan oblysynda 158 jas mamannyń 138-i (87%), Pavlodar oblysynda – 80 túlektiń 68-i (85%) jumysqa ornalasyp, joǵary kórsetkishke jetken. Al eń tómen kórsetkish Aqmola oblysynda (52%), onda jiberilgen 88 bolashaq meditsina qyzmetkeriniń 46-sy ǵana barǵan», - dep túsindirdi spiker.
Jalpy praktika dárigerleri eń suranysqa ie mamandar bolyp qala beredi, olarǵa respýblika boiynsha 652 shtattyq oryn tapshylyǵy bar. Anesteziolog-reanimatologtar da eńbek naryǵynda suranysqa ie, bul mamandar úshin 360,5 shtattyq oryn bos tur.
«Jalpy dárigerlik praktika» mamandyǵynyń túlekteri biylǵy tapshylyqty 60%-ǵa qamtýy tiis, al terapevtter men pediatrlarǵa qajettilik tolyq qanaǵattanýy tiis.
«Biraq anesteziolog-reanimatologtardyń tapshylyǵy joǵary bolyp qalady, óitkeni túlekterdi jumysqa ornalastyrǵannan keiin de shamamen 80% kadr jetispeýshiligi bolady», - dedi Q. Tósekbaev.
Aita keteiik, Qazaqstanda 4122 shtattyq orynǵa dárigerler qajet. Ásirese, anesteziolog-reanimatolog, terapevt, jalpy praktikalyq dáriger, zerthanashy dáriger, akýsher-ginekolog, infektsiialyq dárigerler jetispei jatyr. Ortasha meditsinalyq qyzmetkerler arasynda 8583 bos shtattyq oryn bar.
Bir jylda elimizde 31 myń mamany jumystan shyǵyp, 1200 maman shetelge ketken.
