Áleýmettik jelide Nurgúl Hasanova aqynnyń aitys kezinde aitqan sózinen úzindi jariialap, onyń áreketin synǵa aldy, dep habarlaidy ult.kz.
«Mynaý ne masqara, ne kórgensizdik! Kúni keshe Shaiyr aýylynyń 100 jyldyǵynda bolǵan jaǵdai. WhatsApp arqyly kelip jatyr. “Aiaǵy las tórdi bylǵaidy, aýzy las eldi bylǵaidy” degen, aýzyna kelgenin kókip otyrǵan mynany jelkelep sahnadan qýyp shyǵatyn bir namysty adam bolmaǵany ma sol jerde?! Júz jerden “juldyz”, myń jerden “dúldúl” bolsa da! Mynaý ne basyný, ne tairańdaý?! Aitystyń ádebi, sahna mádenieti qaida?! Aitysty uiymdastyrýshylar men qazylar alqasy ne qarap otyr?! Eldi syilamaý, jerdi qorlaý, tutas halyqty adam qurly kórmei, ar-namysyn taptaý ǵoi bul!» – dep jazdy ol.
Onyń jazbasynan keiin jeli qoldanýshylary da aqynnyń sózin synǵa alyp, pikir bildirdi.
Al Aitys Odaǵynyń tóraǵasy Amandol Áltai bul sharanyń odaqtyń resmi josparynda bolmaǵanyn aitty. Onyń sózinshe, Shaiyr aýylyndaǵy aitys jergilikti azamattardyń uiymdastyrýymen ótken.
«Jeke kásipkerlerdiń demeýshiligimen, sol óńirdiń azamattarynyń uiymdastyrýymen ótken. Bizdiń qatysymyz joq. Ózim uiymdastyrǵan, qadaǵalaǵan aitystarda sahna mádenietiniń saqtalýyna, aqyndardyń ádebine erekshe mán beremin», – dedi Amandol Áltai.
Ol sondai-aq Maqsat Ahanovqa qatysty sheshim qabyldanǵanyn málimdedi.
«Maqsat Ahanovty aldaǵy jarty jylda aitystarǵa qatystyrmaý jóninde sheshim qabyldandy», – dedi Aitys Odaǵynyń tóraǵasy.
