Qazaqstannyń Halyq ártisi Maqpal Júnisova úiiniń qasbeti men irgesin jóndegen qurylysshylardyń jumysyna kóńili tolmaǵanyn aitty. Ánshi bul týraly áleýmettik jelidegi paraqshasynda video jariialap, jaǵdaidy kórsetti, dep habarlaidy ult.kz.
Óner iesiniń aitýynsha, úiin jóndeýge 55 million teńge jumsaǵan. Qurylys jumystary shamamen tórt aiǵa sozylyp, jumysshylar osy ýaqyt ishinde ánshiniń aýlasyndaǵy kiiz úide turǵan.
Alaida qurylysshylar jumysty aiaqtap ketkennen keiin kóp uzamai úidiń kei jerleri buzyla bastaǵan. Qabyrǵalardaǵy materialdar men plitkalar túsip, qasbettiń kei tustary qiraǵan.
Jóndeý sapasyna narazy bolǵan Maqpal Júnisova mundai jaǵdaidy óziniń jalǵyz áiel ekenin paidalanyp ketkendei qabyldaǵanyn aitty.
«Erkegi joq, jesir áiel dep basynǵany ma?» – dedi ánshi.
Onyń videosy áleýmettik jelide qyzý talqylanyp, kópshiliktiń nazaryn aýdarǵan. Osydan keiin marqum joldasynyń týystary ánshige qoldaý kórsetip, úidiń qasbetin qaita jóndeý jumystaryn uiymdastyrǵan.
Keiin Maqpal Júnisova jóndeý jumystarynyń qaita bastalǵanyn kórsetip, qurylysshylarǵa ázilmen eskertý jasady.
«Repetitsiiadan kelip, video túsirip jatyrmyn. Osy kisiler jasap jatqan. Endi senderdi halyq tanidy, durystap jasańdar!» – dedi ol.
Ánshi buǵan deiingi qurylys brigadasynyń brigadirin tanitynyn da aitty. Alaida isti sotqa jetkizip, ýaqyt joǵaltqysy kelmeitinin jetkizdi. Onyń sózinshe, burynǵy qurylysshylar bolǵan jaǵdaidan keiin ózimen bailanysyp, keshirim de suramaǵan.
Aita keteiik, Qazaqstannyń halyq ártisi Maqpal Júnisova Almaty qalasynyń týǵan kúnine arnalǵan kontsertte jastarmen birge óner kórsetip, kórermendi tánti etti.
Maqpal Júnisova kim?
Maqpal Muhamediiarqyzy Júnisova 1964 jyly 11 qańtarda Qaraǵandy oblysy Terekti aýylynda dúniege kelgen. 1988 jyly Ál-Farabi atyndaǵy qazaq ulttyq ýniversitetiniń "mýzyka-drama" bólimin támamdaidy. 1994 jyly Qazaqstan Respýblikasy halyq ártisi, 1999 jyly QR memlekettik syilyǵynyń laýreaty atandy. Ál-Farabi atyndaǵy QazUÝ men Iliias Jansúgirov atyndaǵy memlekettik ýniversitettiń professory. Ánshiniń kóptegen áni tyńdarman júreginen oryn alyp úlgeredi. Olar — "Aqqý sazy", "Armandastar", "Ǵashyq júrek", "Eki juldyz", "Erketaiym", "Jan ana", "Kózderińe ǵashyqpyn", "Máńgilik saǵynysh" jáne t.b.
Maqpal Júnisova men Zamanbek Nurqadilovtiń mahabbat hikaiasy: olar qalai shańyraq kóterdi?
Qazaqstannyń halyq ártisi Maqpal Júnisova men memleket jáne qoǵam qairatkeri Zamanbek Nurqadilovtiń jubai bolǵanyn kópshilik jaqsy biledi. Alaida olardyń otbasylyq ómiri birden bastalmaǵan. Ánshiniń aitýynsha, ekeýi 1991 jyly birge shańyraq kóterip, tek jeti jyldan keiin zańdy nekege turǵan.
Maqpal Júnisova bul týraly 2024 jyly «Din Dina Show» baǵdarlamasynda aityp bergen. Onyń sózinshe, bastapqyda Zamanbek Nurqadilovke ǵashyq bolmaǵan. Kerisinshe, saiasatkerdiń bedeli men ainalasyndaǵy adamdardan seskengen.
Ánshiniń aitýynsha, qarym-qatynastyń bastamasyn Zamanbek Nurqadilov ózi jasaǵan. Maqpal Júnisova onyń usynysyna birden kelispegenimen, keiin ekeýiniń arasynda syilastyq ornaǵan.
«1991 jyly shańyraq kóterdik, 1998 jyly zańdy nekege turdyq», – degen edi ánshi.
Maqpal Júnisova qiyn kezeńderde de jarynyń janynda qalǵanyn aitqan. Onyń sózinshe, Zamanbek Nurqadilov biliktegi qyzmetinen ketkennen keiin de otbasylyq ómirin jalǵastyrǵan.
Erli-zaiyptynyń Merei esimdi qyzy bar. Maqpal Júnisova buǵan deiin qyzyn Zamanbek Nurqadilov ekeýi asyrap alǵanyn aitqan. Ánshi marqum jarynyń birinshi otbasynan týǵan balalary bolǵanyn da jasyrmaidy.
Zamanbek Nurqadilov 2005 jylǵy 12 qarashada Almatyda qaza tapty. Sodan beri Maqpal Júnisova marqum jary týraly estelikterin áleýmettik jelide jii bólisip keledi. 2018 jyly ánshi Nurqadilovpen jáne kishkentai qyzy Mereimen birge túsken sirek videosyn jariialaǵan.
2023 jyly ol joldasynyń ózine jáne qyzyna arnap jazyp qaldyrǵan óleńderin de jariialady. Sol jazbasynda Maqpal Júnisova Zamanbek Nurqadilovpen 1994 jyly 20 qarashada birge shańyraqqa kirgenin atap ótti.
