Mańǵystaý oblysynda úi jaǵdaiynda ystalǵan balyq jegennen keiin aýyr halde aýrýhanaǵa túsken otbasynyń 9 jastaǵy balasy kóz jumdy, dep habarlaidy ult.kz.
Oqiǵa shamamen eki apta buryn bolǵan. Bir otbasynyń tórt múshesi aýyr jaǵdaida jansaqtaý bólimine jetkizilip, dárigerler olardan botýlizm belgilerin anyqtaǵan. Aldyn ala málimet boiynsha, naýqastar úi jaǵdaiynda ystalǵan balyq jegen.
Ýlanǵandardyń barlyǵy jansaqtaý bólimine jatqyzylyp, jasandy tynys alý apparatyna qosylǵan. Sondai-aq olarǵa botýlizmge qarsy arnaiy sarysý engizilgen.
Naýqastardyń arasynda 9 jastaǵy balanyń jaǵdaiy asa aýyr bolǵan. Ol jansaqtaý bóliminde es-tússiz jatqan. Balanyń jaǵdaiynda oń ózgeris baiqalmaǵannan keiin týystary Astanadaǵy mamandardan kómek suraǵan.
Osydan keiin Aqtaýǵa reanimatolog, infektsionist jáne nevrolog mamandar jiberilgen. Dárigerler balanyń ómirin saqtap qalý úshin qajetti meditsinalyq kómek kórsetkenimen, ony aman alyp qalý múmkin bolmady.
Ýlanǵandardyń arasynda balanyń ákesi de bolǵan. Qazirgi ýaqytta onyń jaǵdaiy turaqty. Otbasynyń taǵy eki eresek múshesi dárigerlerdiń baqylaýynda em qabyldaýdy jalǵastyryp jatyr.
