Vitse-premer Qanat Bozymbaev bastaǵan Úkimettik komissiia oqiǵa ornynda jumysyn jalǵastyryp jatyr, dep habarlaidy ult.kz.
Naqtylanǵan málimet boiynsha, oqý-jattyǵý tapsyrmasyn oryndaý kezinde aýa raiynyń kúrt nasharlap, teńizdegi jeldiń kúsheiýinen 17 áskeri qyzmetshini sý alyp ketken. Onyń 12-si qaza taýyp, úsheýi qutqaryldy. Qazir taǵy eki áskeri qyzmetshini izdeý jumystary jalǵasyp jatyr.
Bozymbaev joǵalǵandardy úzdiksiz izdeýdi jáne qaza tapqandardyń otbasylaryna qajetti kómek kórsetýdi tapsyrdy.
Ne jaǵdai boldy?
Aldyn ala málimet boiynsha, oqý-jattyǵý kezinde Kaspii teńizine 19 áskeri qyzmetshi barǵan. Qazirgi ýaqytta olardyń on ekisý qaza tapqany belgili boldy. Úsh áskeri qyzmetshi qutqarylǵan. Olardyń bireýi aýrýhanaǵa jatqyzyldy. Qalǵan áskeri qyzmetshilerdi izdestirý jumystary jalǵasyp jatyr.
Oqiǵa ornyna qutqarý qyzmetteriniń kúshteri men quraldary dereý jiberilgen. Izdestirý-qutqarý jumystaryna Áskeri-teńiz kúshteri men Tótenshe jaǵdailar ministrliginiń bólimsheleri, aviatsiia jáne basqa da tiisti qyzmetter jumyldyryldy.
Oqiǵanyń sebepterin anyqtaý úshin Úkimettik komissiia quryldy. Qazaqstan Respýblikasy Premer-ministriniń ókimimen qurylǵan komissiiaǵa Premer-ministrdiń orynbasary Qanat Bozymbaev jetekshilik etedi.
Komissiia quramyna Qorǵanys ministri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdailar, Densaýlyq saqtaý jáne Kólik ministrlikteriniń basshylyǵy, Bas áskeri prokýror jáne Shekara qyzmetiniń ókilderi kirdi.
Premer-ministr Oljas Bektenov komissiia tóraǵasy Qanat Bozymbaevqa oqiǵa ornyna shuǵyl baryp, áskeri qyzmetshilerdiń qaza bolý sebepterin anyqtaýdy tapsyrdy.
Sonymen qatar komissiiaǵa qaza tapqan áskeri qyzmetshilerdiń otbasylaryna qajetti kómek kórsetý tapsyryldy.
Keiin qaza tapqan áskeri qyzmetshilerdiń aty-jóni jariialandy. Memleket basshysy Qasym-Jomart Toqaev qaza bolǵandardyń otbasylaryna kóńil aitty.
