Mańǵystaý oblysynyń ákimdigi Kaspii teńizindegi oqý-jattyǵý kezinde áskeri qyzmetshilerdiń qaza bolýyna qatysty qylmystyq is eki bap boiynsha tergelip jatqanyn málimdedi. Tergeý barysynda qaýipsizdik talaptaryn saqtamaýy múmkin bolǵan laýazymdy tulǵalar da anyqtalǵan, dep habarlaidy ult.kz.
Qylmystyq is QR Qylmystyq kodeksiniń 453-babynyń 2-bóligi – «aýyr zardaptarǵa ákep soqqan qyzmetke salǵyrt qaraý» jáne 465-baby – «keme júrgizý qaǵidalaryn buzý»boiynsha qozǵalǵan.
Tergeý barysynda áskeri qyzmetshilerdiń qaýipsizdigin qamtamasyz etý, oqý-jattyǵýdy uiymdastyrý jáne qutqarý jumystaryn júrgizý kezinde zań buzýshylyqtarǵa jol berdi degen kúdikke ilingen laýazymdy tulǵalar anyqtalǵan. Olardyń áreketine quqyqtyq baǵa berilmek.
Sonymen qatar, oqiǵadan keiin aýrýhanaǵa jetkizilgen áskeri qyzmetshiniń jaǵdaiy da qaraldy. Densaýlyq saqtaý vitse-ministri Manas Ramazanovtyń aitýynsha, onyń jaǵdaiy turaqty, ómirine qaýip tónip turǵan joq. Áskeri qyzmetshi esin jiǵan jáne qajetti meditsinalyq kómek alyp jatyr. Qasynda ata-anasy bar.
Komissiia otyrysynda qaza tapqan jáne zardap shekken áskeri qyzmetshilerdiń otbasylaryna kórsetiletin kómek máselesi de talqylandy.
Úkimet otbasylarǵa baǵyttalǵan qarajattyń ashyq ári tolyq bólinýin qamtamasyz etýdi tapsyrdy. Kómek memlekettik tólemder men ótemaqylardan bólek, kásipkerler men metsenattardyń qarjylai qoldaýyn da qamtidy.
Osy qarajatty shoǵyrlandyrý úshin arnaiy qor ashylǵan. Onyń jumysy Mańǵystaý oblysynyń ákimdigi tarapynan baqylaýda bolady.
Aita keteiik, Kaspii teńizindegi áskeri oqý-jattyǵý kezinde aman qalǵan sarbaz Temirhan Aqjol Timýrulynyń videosy tarady.
Kaspiide 14 sarbaz sýǵa ketti
Aldyn ala málimet boiynsha, áskeri oqý-jattyǵý kezinde Kaspii teńizine 19 áskeri qyzmetshi barǵan. Qazir olardyń 14-iniń qaza bolǵany belgili. Úsh áskeri qyzmetshi qutqarylǵan. Olardyń bireýi aýrýhanaǵa jetkizilgen.
Qaiǵyly jaǵdaidan keiin oqiǵa ornyna qutqarý qyzmetteriniń kúshteri dereý jiberildi. Izdestirý jumystaryna Áskeri-teńiz kúshteri men Tótenshe jaǵdailar ministrliginiń bólimsheleri, aviatsiia jáne basqa da tiisti qyzmetter tartyldy.
Oqiǵanyń sebepteri men mán-jaiyn anyqtaý úshin Úkimettik komissiia quryldy. Komissiiaǵa Premer-ministrdiń orynbasary Qanat Bozymbaev jetekshilik etedi.
Komissiia quramyna Qorǵanys ministri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdailar, Densaýlyq saqtaý jáne Kólik ministrlikteriniń basshylyǵy, Bas áskeri prokýror men Shekara qyzmetiniń ókilderi kirdi.
Premer-ministr Oljas Bektenov komissiia tóraǵasy Qanat Bozymbaevqa oqiǵa ornyna shuǵyl baryp, áskeri qyzmetshilerdiń qaza bolý sebepteri men jaǵdaiyn anyqtaýdy tapsyrdy. Sondai-aq qaza bolǵandardyń otbasylaryna qajetti kómekti uiymdastyrý mindetteldi.
Keiin qaza tapqan áskeri qyzmetshilerdiń aty-jóni jariialandy. Memleket basshysy Qasym-Jomart Toqaev marqumdardyń týǵan-týystaryna kóńil aitty.
Qazir oqiǵa boiynsha tergeý júrgizilip, áskeri qyzmetshilerdi izdeý-qutqarý jumystary jalǵasyp jatyr.
