Shymkenttik 20 jastaǵy jigit Reseige jumys isteýge baryp, soǵysqa attandyrylýy múmkin ekenin aityp, anasynan kómek suraǵan, dep habarlaidy ult.kz.
KTK arnasynyń málimetinshe, Ainabek Keldibek Reseige 27 tamyzda barǵan. Onyń aitýynsha, oǵan joǵary jalaqysy bar kúzetshilik jumys usynylǵan. Jatatyn jeri men tamaǵy da tegin bolatyny aitylǵan.
Ainabek orys tilin tolyq túsinbegen. Reseige barǵan soń oǵan mektep pen balabaqshada kúzetshi bolyp jumys isteý úshin qujattarǵa qol qoiý kerektigi aitylǵan. Alaida keiin onyń soǵysqa jiberiletini belgili bolǵan.
Jigittiń aitýynsha, oǵan qujattarǵa qol qoimasa, 15 jylǵa sottalatyny aitylyp, qysym kórsetilgen.
«Biz aldanyp, qol qoidyq. Sodan keiin: "Sender endi soǵysqa ketesińder. Ne soǵysqa barasyńdar, bolmasa 15 jylǵa sottalasyńdar" dedi. Qoryqqanymyzdan amal joq kelip qaldyq. Endi qaitatyn jol izdep jatyrmyz», – dedi Ainabek Keldibek.
Jigit qazir poligonda ekenin aityp, jaqyn kúnderi qarýly qaqtyǵys aimaǵyna jiberilýi múmkin ekenin jetkizgen. Onyń qasynda taǵy 10-ǵa jýyq qazaqstandyq bar kórinedi.
Ainabektiń anasy Perizat Eleýsizovanyń aitýynsha, uly kún saiyn habarlasyp, elge qaitýǵa kómektesýdi suraidy.
«"Qutqaryńyzshy, anashym" dep jylaidy. Balam qazir poligonda otyr eken», – dedi ol.
Ainabektiń týystary osyǵan bailanysty quzyrly organdarǵa júgingen. QR Syrtqy ister ministrligi Resei Federatsiiasynyń Syrtqy ister ministrligine diplomatiialyq nota joldanǵanyn málimdedi.
«Resei tarapymen tiisti jumys jalǵasýda. Jumysymyzdyń nátijesi boiynsha qosymsha habarlaimyz», – dedi ministrlik.
Zańgerler mundai jaǵdaidyń alǵashqy ret bolyp otyrmaǵanyn aitady. Olar shetelge jumysqa barar aldynda usynystyń zańdylyǵyn tekserip, eń aldymen eńbek kelisimshartynyń talaptaryna nazar aýdarýǵa shaqyrady.
Zańger Meiirman Shekeevtiń aitýynsha, shetelge jumysqa ketken azamattardyń týystary osyndai jaǵdailarǵa bailanysty jii habarlasady.
Beiresmi málimet boiynsha, Reseide jumys isteýge barǵan 2,4 myńnan astam qazaqstandyqtyń soǵysqa tartylǵany týraly aqparat bar. Bul derek resmi túrde rastalmaǵan.
Mamandar azamattardy shetelde joǵary jalaqy men jeńil jumys usynatyn deldaldardyń sózine birden senbei, eńbek shartyn muqiiat tekserýge shaqyrady.
