Qazaqstannyń Profilaktikalyq meditsina akademiiasynyń prezidenti Almaz Sharman Almaty óńirlik kommýnikatsiialar qyzmetine bergen suhbatynda COVID-19-ben aýyryp, jazylǵandardyń qaýipsizdik jáne aldyn alý sharalaryn saqtaý qajettiligine qatysty suraqtarǵa jaýap berdi, dep habarlaidy QazAqparat.
«Koronavirýspen aýyryp, jazylǵandar báribir qaýipsizdik sharalaryn saqtaýlary kerek. Sebebi, koronavirýstan basqa da biraz infektsiialar bar. Ásirese qazir, tumaý maýsymy bastalyp jatyr jáne aýrýdyń aldyn alyp, eskertý mańyzdy. Tipti eger siz aýyryp, jazylǵan kúnde de koronavirýs muryn qýysynda bolýy múmkin jáne virýs qol arqyly berilýi múmkin. Mine, sol sebepti de maskanyń qalai bolǵanda da tiimdiligi bar. Áleýmettik qashyqtyqtyń da mańyzy zor. Álemde koronavirýsty qaitadan juqtyrýdyń 5 oqiǵasy belgili boldy. Osyndai faktiler bar. Sol sebepti, qaitadan juqtyrýdyń bolmaitynyna 100 paiyz kepildik joq», - dep atap ótti A.Sharman.
Onyń aitýynsha, zertteýlerge sáikes, aýyryp, jazylyp shyqqandarda antidene paida bolyp, damidy. Biraq, soǵan qaramastan onyń qansha ýaqyt saqtalatyny belgisiz.
«Aýrý juqtyrǵandardyń báriniń immýniteti nyǵaiatyny - belgili nárse. Biraq, sonymen birge, basylý (sóný) fenomeni de bar, antidenelerdiń bastapqyda tsikly joǵary bolady, biraq nelikten ekeni belgisiz, keiinnen tómendep ketedi. Alaida taǵy bir úshinshi jaǵdai bar, ol - virýstyń mýtatsiiaǵa ushyraityny, ol ózgerip otyrady. Soǵan qaramastan, onyń ózgerip otyratyny, dereý kúsheiip, bolmasa álsireitini týraly dálelder bar», - dep atap ótti professor.
Qala turǵyndarynyń aldyn alý sharalaryn kúsheitý qajettigi týraly aitqan qazaqstandyq professor maskany qoldaný kezinde ony durys taǵý kerektigin eskertti.
«Maska taǵý óte mańyzdy. Biraq, maskany durys taqqan jón. Men kóp adamnyń maskasyn murnyn ashyp, iegine taǵyp júretinin jii kóremin. Bárine únemi virýstyń kóbi muryn qýysynda bolatynyn eske salamyn, jai ǵana aýyzdy jabý arqyly olar ne ózderin, ne basqalardy qorǵamaidy. Sol sebepti maska taǵý jáne ony durys taǵý mańyzdy. Ekinshiden, maska taǵý arqyly siz tek ózińizdi ǵana qorǵap qoimai, basqalardy da oilaisyz. Úshinshiden, adam kóp jinalatyn oryndardan aýlaq júrýge tyrysý qajet. Eýropa men AQSh-ta nege ekinshi tolqyn bastalyp ketti. Kúnniń salqyndaýyna bailanysty, adamdar ǵimarat ishinde jii otyratyn boldy. Nátijesinde, adamdar toptasady, al kóp ǵimarattardyń jeldetilýi qiyn. Bul temekiniń tútini siiaqty. Eger sen aýasy jeldetilmeitin bólmede otyrsań, temekiniń tútini bólmede ainalyp júredi. Eger ǵimaratta virýsty juqtyrǵan adam bolsa, virýsy bar aerozol aýada taralyp, basqalarǵa juǵady. Sol sebepti adam kóp jinalatyn oryndardan, ásirese, jabyq ǵimarattardan aýlaq júrip, bólmeni jeldetip, qashyqtyq saqtaý kerek. Osy erejelerdi saqtaý arqyly ózińdi aýrýdan qorǵaýǵa bolady», - dep qorytyndylady A.Sharman.
