Qazaqaltyn kompaniiasyna qarasty Bestóbe kenishinde qaiǵyly jaǵdai boldy. Shahtada zańsyz túrde ken qazbaq bolǵan eki adam qaza tapty, dep habarlaidy ult.kz.
Oqiǵa 19 mamyr kúni Bestóbe kenishi aýmaǵyndaǵy «Ortalyq» shahtada tirkelgen. Aldyn ala málimet boiynsha, 38 jáne 21 jastaǵy eki er adam zańsyz ken óndirý maqsatymen shahtaǵa túsken. Sol kezde taý-ken massasy opyrylyp, ekeýin topyraq basyp qalǵan.
Marqumdardyń deneleri shahtadan shyǵaryldy. Olar Soltústik Qazaqstan oblysynyń turǵyndary ekeni anyqtaldy.
Oqiǵaǵa bailanysty politsiia sotqa deiingi tergeý bastady. Stepnogorsk qalasynyń politsiia bólimi Qylmystyq kodekstiń tiisti baby boiynsha is qozǵap, oqiǵanyń barlyq mán-jaiyn anyqtap jatyr. Qazir qajetti saraptamalar taǵaiyndalǵan.
Tergeý nátijesinde qaiǵyly jaǵdaidyń naqty sebepteri anyqtalmaq.
