Facebook jelisinde Aiman Djarlyqasymova Atyraý oblystyq onkologiialyq ortalyǵyndaǵy jaǵdaiǵa qatysty jazba jariialap, meditsinalyq mekemeniń qazirgi ahýalyn synǵa aldy, dep habarlaidy ult.kz.
Tanysyn aýrýhanaǵa jatqyzýǵa birge barǵan kezde kórgen jaǵdaiy onyń kóńilin qaldyrǵan.
Avtordyń sózinshe, onkologiialyq naýqastardyń bir bóligi tekserýden ótip, em alyp, otaǵa konteiner túrindegi ǵimarattarda daiyndalyp jatyr.
«2026 jyl bolsa da, ózińdi Keńes Odaǵyna nemese dalalyq gospitalǵa túskendei sezinesiń», – dep jazdy ol.
Sondai-aq qabyldaý bóliminde aýa salqyndatqyshtyń joqtyǵy, ǵimarattyń ishi tym ystyq ári qapyryq bolǵany aitylǵan. Onyń pikirinshe, mundai jaǵdai aýyr em qabyldap júrgen onkologiialyq naýqastar úshin ásirese qiyn.
Aiman Djarlyqasymova elektrondy kezek júiesi de jumys istemegenin jetkizdi. Sonyń saldarynan adamdar qolmen qaǵazǵa jazylyp, eki saǵattan astam kezek kútken.
«Aýlada naýqastar men olardy ertip kelgen adamdar oryndyqta, jerge otyryp, tipti aǵash palletterdiń ústinde kútýge májbúr boldy. Olardyń arasynda basqa qalalardan kelgen, himiialyq terapiiadan ótken jáne operatsiiadan keiingi egde jastaǵy adamdar da bar», – deidi jazba avtory.
Budan bólek, onyń aitýynsha, aýrýhananyń anyqtama qyzmetine habarlasý qiyn. Qala telefon nómirleri jumys istemeidi, tek uialy bailanys arqyly ǵana habarlasýǵa bolady.
Jazbada aýrýhana qyzmetkerleri nysandy qaita jańǵyrtýǵa arnalǵan jobalyq-smetalyq qujattamaǵa qol qoiylǵanyn, alaida qurylys jumystarynyń naqty qashan bastalatyny belgisiz ekenin aitqany keltirilgen. Sondai-aq konteinerlik ǵimarattar memlekettik qarjyǵa emes, meditsinalyq mekemeniń óz qarajatyna ornatylǵany jazylǵan.
Osyǵan bailanysty Aiman Djarlyqasymova Densaýlyq saqtaý ministrligine birqatar saýal qoiyp, onkologiialyq kómek kórsetiletin mekemelerde naýqastarǵa laiyqty jaǵdai jasalýy tiis ekenin atap ótti.
Ázirge Densaýlyq saqtaý ministrligi men Atyraý oblysynyń densaýlyq saqtaý basqarmasy bul máselege qatysty resmi pikir bildirgen joq.
Foto: facebook.com/aiman.jarlykassymova
