Qazaqstanda ushqyshsyz jolaýshylarǵa arnalǵan áýe kóligin damytý jobasy resmi túrde bastaldy. Allur avtomobil kompaniiasy Qytaidyń EHang jáne qazaqstandyq QazTehna kompaniialarymen birlesip, elimizde eVTOL – tik kóterilip, qona alatyn elektrli ushqyshsyz jolaýshylar áýe júiesin engizýge kiristi, dep habarlaidy ult.kz.
Jobanyń alǵashqy kórsetilimi Astanada ótip jatqan «Bolashaq oiyndary – 2026» halyqaralyq týrniri aiasynda uiymdastyryldy. Is-shara barysynda EHang kompaniiasynyń EH216-S ushqyshsyz jolaýshylar apparaty arnaiy ruqsat etilgen aýmaqta synaq ushýyn oryndady.
Synaq ushýyna Qazaqstan Respýblikasynyń Kólik ministri Nurlan Saýranbaev jolaýshy retinde qatysty.
Prezident kómekshisi: Bul – arman bolǵan tehnologiia
Is-sharany QR Prezidentiniń kómekshisi Qýanyshbek Esekeev ashyp, jańa tehnologiianyń Qazaqstan úshin mańyzyn atap ótti.
«Búgin biz buryn tek arman bolyp kóringen elektrli ushý apparatynyń kýási bolyp otyrmyz. Endi ol praktikalyq synaqtan ótip, jańa kólik júiesiniń bir bóligine ainalyp keledi. Bul kórsetilimniń "Bolashaq oiyndary" aiasynda ótýiniń simvoldyq máni bar. Batyl tehnologiialyq ideialardyń naqty sheshimderge ainalýynyń jarqyn kórinisi», – dedi ol.
Alǵashqy jolaýshy – Kólik ministri
Synaq ushýynan keiin Kólik ministri Nurlan Saýranbaev alǵan áserimen bólisti. Onyń aitýynsha, ushý kezinde qorqynysh bolmaǵan.
«Bul Qytaida birneshe ret synalǵan tehnologiia. Sondyqtan eshqandai kúmán bolǵan joq», – dedi ministr.
Ushý kezinde ne oilaǵany týraly suraqqa ministr:
«Men "Qazaqstan, alǵa!" dep oiladym. Biz barlyq jańa tehnologiialarda aldyńǵy qatarda bolýymyz kerek. Bolashaq osy baǵytta», – dep jaýap berdi.
Ministrdiń aitýynsha, apparat óte jeńil kóteriledi. Ushý barysynda azdaǵan diril men shý seziledi, alaida bul qalypty qubylys ekenin aldyn ala eskertken. Sondai-aq kabina kúnniń áserinen sál qyzǵanymen, salqyndatý júiesi qarastyrylǵanyn aitty.
Sóz sońynda ol:
«Jaqyn arada ózderińiz de ushyp kóresizder dep oilaimyn», – dep, bul kóliktiń bolashaǵy zor ekenine senimdilik bildirdi.
Apparattyń múmkindigi qandai?
EH216-S eki jolaýshyny tasymaldaýǵa arnalǵan. Ol saǵatyna 130 shaqyrymǵa deiin jyldamdyqpen ushyp, 35 shaqyrymǵa deiingi qashyqtyqty eńsere alady.
Jobanyń alǵashqy kezeńinde Qazaqstannyń tabiǵi, tarihi jáne mádeni oryndary ústinen 5–30 minýttyq týristik áýe baǵyttaryn iske qosý josparlanyp otyr.
Budan bólek, mundai apparattardy shuǵyl meditsinalyq kómek kórsetýge, dári-dármek jetkizýge, órt sóndirýge, logistikaǵa jáne tótenshe jaǵdailarda paidalanýǵa múmkindik bar.
Qazaqstanda óndirisin jolǵa qoiý josparlanǵan
Atalǵan jobany iske asyrý Allur kompaniiasynyń Qazaqstanda zamanaýi óndiristerdi damytý jáne álemdik ozyq tehnologiialardy engizý jónindegi júieli jumysynyń kezekti kezeńi bolyp tabylady. Sońǵy jyldary kompaniia otandyq avtomobil jasaý ónerkásibin damytýǵa, óndiristi lokalizatsiialaý jáne jańa indýstriialyq quzyretterdi qalyptastyrýǵa eleýli úles qosyp keledi. Endi Allur osy tájiribesin jańa baǵytta jalǵastyryp, elimizde ushqyshsyz aviatsiialyq júielerdi óndirý men damytýdyń negizin qalady.
Qazaqstan Respýblikasynyń Prezidenti Qasym-Jomart Toqaev ulttyq ekonomikanyń básekege qabilettiligi joǵary tehnologiialyq ónerkásipti damytýǵa, zamanaýi óndiristerdi lokalizatsiialaýǵa jáne ozyq tehnologiialardy transfertteýge tikelei bailanysty ekenin birneshe ret atap ótken bolatyn. Memleket basshysy innovatsiialarǵa, injenerlik quzyretterge jáne joǵary qosylǵan quny bar ónim shyǵarýǵa negizdelgen jańa býyn ekonomikasyn kezeń-kezeńimen qalyptastyrý mindetin qoiǵan.
Allur, EHang jáne QazTehna birlesken jobasy osy strategiialyq basymdyqtarǵa tolyq sáikes keledi jáne Qazaqstanda jańa kólik salasyn, joǵary tehnologiialyq óndiristi jáne innovatsiialyq ekojúieni damytýdaǵy mańyzdy qadamdardyń birine ainalady.
Aita ketsek, EHang kompaniiasy ushqyshsyz áýe tehnologiialary salasyndaǵy álemdik kóshbasshylardyń biri bolyp sanalady jáne álemde alǵash bolyp eVTOL sanatyndaǵy ushqyshsyz jolaýshylar kemesiniń kommertsiialyq paidalanylýyna qajetti negizgi sertifikattardyń tolyq toptamasyn alǵan.
